Sunday, September 04, 2005

كيف يبايعون الرئيس في شارعي


ألف وأدور في الشوارع الجانبية حتى أستطيع أن أدخل للشارع الذي يقع فيه كوافير محمود بدون أن اضطر للدخول في معمعة الشارع الرئيسي. يخطر لي للمرة الألف أنه كان من الأسهل أن اذهب للكوافير سيراً. تلفت نظري لافتة ضخمة على أول شارعنا الجانبي الصغير: "كوافير هنومة يبايع السيد الرئيس حسني مبارك". لا أدري لماذا أذهلتني هذه اللافتة بالذات في خضم اللافتات التي سدت نور الشمس في الفترة الماضية. ربما لأني أعرف هنومة شخصياً، وزوجها وابنها الذي مات بجرعة مخدرات زائدة، وأعرف أنها ليس لها مواقف سياسية ولا حتى لا سياسية، كما أعرف أنها ليست عضو في مجلس الشعب، ولا أظنها تطمح لذلك. فلماذا إذن هذه اللافتة؟

وصلت عند محمود (وهو شخصية تستحق مسلسل رمضاني كامل وليس فقط قصة صغيرة)، وسلمت عليه ثم رسمت على وجهي إمارات الاستنكار الشديد: "إيه يا محمود؟! إيه اللي إنتوا فيه ده! إزاي لحد دلوقتي ما حطيتوش يافطة مبايعة الريس؟!"

هز محمود رأسه أسفاً: "والله أنا قلت لشريكي لكن هو رفض...رغم إني كنت ناوي أعمل حاجة مختلفة خالص!"

فاجئني رده فأخذت في الضحك: "حاجة مختلفة خالص إزاي يعني؟ كنت هتعمل له "هايلايت"؟ ولا "نيو لوك" بفورمة جديدة؟!"

"اضحكي اضحكي...أنا باتكلم جد. أنا كنت ناوي اعمل من الناصية بتاعتي للناصية اللي ادامي تعليقة من القماش بتاع الصوان...الملون ده...واكتب على قماش نضيف كده "كوافير محمود يبايع السيد الرئيس...برنامج خاص للعرائس" واجيب فروع نور بتطفي وتنور كده...ولا حد يقدر يجي يقول لي شيل اليافطة دي".

"ومين يقدر يجي يقول لك شيل يافطة الريس؟"

"لأ مش يافطة الريس...يافطة دعاية المحل...تكونيش فاكره إن كل اللي حاطين يفط دول بيبايعوا الريس بصحيح؟ ولا يكونوا منافقين وحشين؟ لأ! دي كلها دعاية...أيوه طبعاً! دول بيعملوا دعاية لنفسهم على قفا الانتخابات. هو أنا لو حبيت اعمل التعليقة دي على إنها دعاية للمحل تفتكري بتوع الحي هيسيبوني؟ لأ طبعاً! ده إنتي علشان تحطي أي يافطة أو تعاليق نور في الشارع لازم تجيبي إذن من الحي...والحي يوافق لك أو ما يوافقش...وكمان يقول لك تحطي كام لمبة في فرع النور!"

خرجت من عند محمود بشعر أكثر نعومة ومخ أكثر استنارةً. شكرته بحرارة قبل أن اخرج، فلولاه لكانت أخذتني الظنون بهنومة وتوجهاتها، وربما كنت قاطعتها أيضاً!


23 comments:

  1. يعلن مخبز الأمانة .. أن ال6 أرغفة بجنيه بدلا من 5 .. على شرف الرئاسة

    فى الجيزة

    ReplyDelete
  2. ده بجد؟!

    أنا جاتلي فكرة...إننا نعمل قائمة باسماء كل اللي معلقين اليفط دي...ونحاكمهم بعد كده بتهمة التعامل مع الاحتلال وأعوانه

    أو نكتب كتاب في إطار أدبيات الوصولية والنفاق وعبادة الحاكم

    ReplyDelete
  3. طب وإللي معلقين يفط تأييد أيمن نور مثلا حنحاكمهم بتهمة إيه؟؟ :))

    ReplyDelete
  4. البلد اليومين دول بقت كلها يفط...و أنا مروحة من المعادي من كام يوم كانوا بيعلقوا يفط كتير قوي متكربسة ناحية منشية ناصر...قال يعني هي ناقصة زحمة!!!

    ReplyDelete
  5. يا بختك انتى عندك بيبايعوا الرئيس انا بقى الرئيس كان فى شارعى
    انا باشتغل فى القاهره وباروح المنصوره يوم الخميس وبارجع يوم السبت
    وبعيد عن السامعين الخميس اللى فات اكتشفت ان الريس هييجى اول الاسبوع المنصوره عشان الناس تبايعه ويظبط يعنى
    بس وعليها قضيت الاجازه فى الضلمه لانهم قطعوا النور عن الشارع اللى ذنبه الوحيد مساحه واسعه فى اوله بيتعلموا فيها القياده(السيارات بس ما حدش يفهمنى غلط)
    فقعدوا للصبح يرصفوا فيه ويصلحوا فى اكشاك النور عشان تستحمل نور الريس
    اقصد النور بتاع الصوان اللى نصبوه طبعا (مصممين تفهمونى غلط)
    بس انا الحمد لله ربنا نجدنى ورجعت القاهره قبل ما ييجى
    وبعدها بيوم لقيت اهلى بيكلمونى من عند قرايبنا بيقولولى انهم ما قدروش يروحوا البيت وقرروا يباتوا بره بدل ما يباتوا فى البكس
    الظريف ان الشارع اللى اتبهدلوا سكانه ما اترصفش منه غير تلته بالظبط على مقاس عربيه الريس ما تركن يعنى
    وعجبى
    الله يرحمك يا صلاح يا جاهين

    ReplyDelete
  6. الحاجة المثيرة ان مابين مئات اليفط اللي شفتها بتؤيد مبارك قدرت وبعد جهد جهيد اني المح يافطتين تأييد لأيمن نور. لكن الشيء العجيب ان ما كنش مكتوب غير "نؤيد ايمن نور" وبس ... يعني لا محل فلان ولا عضو مجلس الشعب علان ولا فرن كان يا ما كان. فكرت ولقيت انها حاجة من اثنين: يا إما حد بيؤيد ايمن نور وخايف يكتب اسمه لانه عارف ان مبارك كسبان كسبان، يا إما ان ايمن نور بيؤيد نفسه!

    ReplyDelete
  7. طب الغريب ان الشريط بتاع المسجات بتاع قناة المحور كل دقيقة واحد يبعت رسالة انه بيؤيد الريس بابا حنني

    طب تفتكري دول كسبانين ايه ولا يكون هو شاحنله كارت ب 100 وقاعد قدام التلفيزيون بيبعت يؤيد نفسه

    انا شايف ان اللي بيحصل ده فيلم هندي وفاشل كمان

    ReplyDelete
  8. النهارده الصبح شفت يافطة في شارع السودان لأحد المحلات تؤيد مبارك

    اليافطة بتقول: انت وبس إللي حبيبي

    لا تعليق

    ReplyDelete
  9. احنا عندنا في اسكندرية يفط بتقول ايه
    احنا عايزين المتعلم مش اللي لسه هايتعلم

    ReplyDelete
  10. وجهه نظر محمود الكوافير تستحق الإحترام برده ...عموما أنا هابقى أسأل ممدوح الحلاق وأشوفه ناصح كده ولا لأ

    ReplyDelete
  11. يا جماعه أنا بأناشدكم....اللي يشوف يافطة تستحق يبعتلي...ونعمل جايزة "أمسخر يافطة"و

    ReplyDelete
  12. ممكن أعرف فين مخبز الأمانة من فضلك؟ :P

    اللي معلقين يفط أيمن نور نحاكمهم عشان اليفط لونها برتقاني مش بامبي...متهيألي ده سبب كافي جداً

    اللي بيؤيد أيمن نور من غير ما يكتب اسمه صوته باطل! زي التلميذ اللي يحل امتحان و ما يحطش اسمه بظبط...على العموم هو ممكن يكون فاعل خير

    هبة....أنا وكل زملائي في المكتب بنشكرك جداً على "انت وبس اللي حبيبي" لإننا من الصبح ما بطلناش ضحك عليها :)

    بيانيست: طب والله وجهة نظر! بس ماذا لو هذا المتعلم متبلم أصلاً؟

    ReplyDelete
  13. مخبز الأمانة ده فى الوايلى

    ReplyDelete
  14. ولقيت دي: مين قدنا مبارك عندنا

    ReplyDelete
  15. نعم لمبارك الذي وهب نفسه فداء لمصر

    ReplyDelete
  16. الشيخة ماجدة " رب العالمين يؤيد مبارك !"
    نعم يا شريف يا مبارك ياللي تاييدك من الله رب العالمين وسدنا ( مكتوبة كده )امحمد صلى الله عليه وسلم يا ابن اطهر نسب جدك على بن ابي طالب وجدتك فاطمة الزهراء البتول وجدك مولانا الحسين وانا شوفت ( برده ممكتوبة كده ) في رؤيا ظاهر باطن ان تاييدك مش بمزاجك ده تاييد من رب العالمين وحضرة النبي الكريم يا مبارك يا رئيس مصر يا حبيب العالم كله احنا شعب مصر لو راجعنا انفسنا كويس وتضرعنا الى الله بقلب مخلص نفتكر كل الجهاد اللي انت جاهدته من اجل مصر وشعبها قال تعالى " ان ينصركم الله فلا غالب لكم " الشريفة الشيخة ماجدة المعالجة بالقران الكريم
    نقلا عن جريدة المصري اليوم
    ولا يوجد اي تعليق لدي

    ReplyDelete
  17. أغفلت أهم نقطة بالنسبة لي ف الحدوتة دي يا رحاب، إلا وهي: لماذا رفض شريك محمود؟

    ودي يافطة أيام استفتاء المادة 76.

    ReplyDelete
  18. كنت داخل اكتب نص اليافطة بتاعة "انت وبس اللي حبيبي" لقيت هبة كاتباها.

    عموما فيه كمان دي:
    "لا لا لا لا لا لا لا...........لغيرك يا مبارك"
    و"لا رئيس إلا مبارك" على غرار لا إله إلا الله.

    فيه صديق رفض ذكر اسمه قال لي إن فيه يافطة تأييد لمبارك اتشالت من المعادي كانت بتقول:
    "وعسى أن تكرهوا شيئا وهو خير لكم"

    ReplyDelete
  19. أرثى؟! ده اللاوعي بيتكلم ولا إيه؟! :)

    شريك محمود رفض عشان هو مش عاوز يبايع الريس

    إزيك يا حمكشة :)

    ReplyDelete
  20. طب وشفت الصورة اللي في الجزيرة النهارده؟ كفاية ليه هو البديل إيه

    تصدق إني اتخايلت بيافطة عسى أن تكرهوا شيئاً دي!!

    بس يظل أحسن حاجتين سمعتهم الفترة اللي فاتت: إدي مبارك فيزا وخديه يا كونداليزا ولا مبارك أب وابن لا للفردة والاستبن

    ReplyDelete
  21. ودي من أمين: سعة صدرك يا مبارك تساعي من المصريين ملايين

    ReplyDelete
  22. وخدى دى عندك:
    احنا حنبايع المعلم مش اللى لسه حيتعلم

    ReplyDelete
  23. اختارك الله لمصر
    فكيف لا نختارك نحن

    I took a photo for it on my latest blog.
    http://emanm.blogspot.com/2005/09/blog-post_10.html
    This was aktar yafta mostafeza shoftaha

    ReplyDelete