Wednesday, December 28, 2005

حدوتة في التياترو



وجه لي زرياب دعوة كريمة لتقديم فقرة في التياترو الأسبوع ده وأنا اتبسطت أوي إن فرصتي لاقتحام عالم الفن جت أخيراً :)

Thursday, December 08, 2005

أسباب بسيطة



"إنت ليه مش بتمسك إيدي وإحنا ماشيين في الشارع؟"
"لأ بلاش...افرضي حد من قرايبك شافنا؟ والا حد من أصحاب أخوكي في الكلية؟ إن شاء الله يا حبيبتي بكره نتخطب وامسك إيديكي ادام الدنيا كلها".

.................................

"إنت ليه مش بتمسك إيدي وإحنا ماشيين في الشارع؟"
"علشان مش عاوز حد يفتكر إننا علشان اتخطبنا هنصيع بقى ونعيش حياتنا...وبعدين بصراحة كده أنا مستحرم...إن شاء الله بكره نتجوز وامسك إيدك وإنتي مراتي حبيبتي في الحلال".

.................................

"إنت ليه مش بتمسك إيدي وإحنا ماشيين في الشارع؟"
"يا حبيبتي إحنا مش مراهقين بقى هنمسك إيد بعض في الشارع وكده...إحنا اتنين متجوزين ومحترمين وعندنا بيت نعمل فيه اللي عاوزين نعمله".

.................................

"إنت ليه مش بتمسك إيدي وإحنا ماشيين في الشارع؟"
"يعني امسك إيدك والا امسك إيد البنت والا اشيل الأكياس دي كلها؟!"

.................................

"إنت ليه مش بتمسك إيدي وإحنا ماشيين في الشارع؟"
"إيدك إيه بس اللي هامسكها دلوقتي! إنتي عاوزه جوز بنتك يقول علينا كبرنا وخرفنا؟!"

.................................

"أنا بس كان نفسي تمسك إيدي وإحنا ماشيين في الشارع...عادي يعني...من غير مناسبة أو هدف محدد...بس تمسك إيدي...ماكنتش عاوزاك تمسكها علشان تسندني أو علشان أنا مش قادرة أمشي لوحدي مثلاً...أو علشان ده الصح اللي مفروض تعمله مع مراتك وهي عيانة...ولا علشان...زي دلوقتي...أنت خايف لو سبتها وقمت هاموت...لأ...تمسك إيدي علشان أنت عاوزها تفضل في إيدك...بس".

Monday, December 05, 2005

حاجات ومحتاجات



معلش يا غادة...أنا مش هاقدر اكتب عن سبع حاجات بظبط. أنا دماغي سايحة على بعض الأيام دي...ده غير إني أصلاً مش بحب رقم سبعة.

حاجات نفسي أعملها:
- اكتب كتاب يكسر الدنيا (زي نايتي بظبط) ويبيع كتير ويبقى عندي فلوس تكفي اشتري كوخ على البحر في حتة مهجورة بس البحر بتاعها يكون حلو واعيش هناك اكتب واقرا واترجم واسمع مزيكا وارقص وبس.
- ابقى أحسن واحدة تعمل ورق عنب في العالم
- اتعلم ارقص سالسا وميرينجي وباتشاتا كويس جداً
- اخلص كل الكتب اللي عاوزة اقراها
- اخلص الماجيستير...أو بالأصح ابدأ فيه
- ما اتكسفش اتكلم فرنساوي ادام الناس...واتعلم أسباني بجد مش بالفهلوة
- اقضي شهر بألف أوروبا

حاجات باعرف اعملها/بحب اعملها:
- الكيك بأنواع مختلفة
- لما باطبخ...باطبخ حلو
- أقول نكت
- ارقص بلدي
- اعمل من الفسيخ شربات واحل مشاكل ناس تانية بمنتهى السهولة (ويجيلي شلل عقلي عند أبسط مشاكلي)
- احكي حكايات...ولو الناس سابتني ممكن اقعد اتكلم بدون توقف لساعات
- اعمل مؤثرات صوتية وأنا باحكي الحكايات (طاخ...تش...تك تك تك...تي تي تي...عاااااا...تيكيلم تيكيلم)
- اتفرج على أفلام مختلفة ورا بعض في السينما من أول اليوم لآخره

حاجات مش باعرف أعملها:
- اتحكم في تعبيرات وشي
- ورق العنب
- أنام 4 ساعات متواصلة...أنا باقلق من النوم بمعدل مرة كل ساعتين
- اعزف بيانو بالنوتة الموسيقية...باعزفه سماعي بس...بعد سنين وسنين من التدريب!


حاجات بتقلقني:
- قياس محيط الوسط بتاعي
- ألاقي ماما صاحية لما ابقى مروحة متأخرة
- ما الحقش اعمل كل الحاجات اللي عاوزه اعملها
- يطلع في رادار وأنا سايقة بسرعة ويسحبوا مني الرخص

حاجات بأقولها دايماً:
- يا مصيبتي (تُنطق "يا مسيبتي")
- أموت أنا! (تصاحبها غمزة أو تلعيب حواجب)
- ياااا حالوللي!
- يا حياتي (أيوه يا حياتي...نعم يا حياتي...لأ يا حياتي)
- إشمعنى؟

حاجات مش عارفه الناس إزاي بتقدر تعملها:
- تنام من غير ما تغسل رجليها وسنانها وتلبس هدوم نضيفة
- تنام 8 أو 9 أو 12 ساعة متواصلة

حاجات ما أظنش إنها هتتغير فيا أبداً:
- العند...العند...العند (صوت راس بتخبط في الحيط)
- افتكر حوارات بالكامل وافتكر كمان الناس كانت لابسة إيه لما قالتها
- الهرتلة...تخيلوني كده...تيتة رحاب المهرتلة :)
- إني ابقى حساسة أوي...حاجات صغيرة جداً تخليني تعيسة وحاجات صغيرة جداً تخليني أسعد واحدة في الدنيا

أغنية لازقة في دماغي اليومين دول:
أولاً هي بترقّص أوي...ده غير إنها جامدة:
"جرب من اللي أنا دقته معاك
بكره هتمشي تبص وراك
وهتتعذب...اتقل اتقل...إوعى تفكر إني ملاك
لا يا حبيبي أنا هاقسى عليك
بكره تشوف الويل بعينيك
مش هاتعاتب ولا هاتكلم...وقت عتابك عدى عليك
طيب طيب صبرك حبة...ما عرفت خلاص إيه فيها
أستاذ في القسوة لكن على مين...ده أنا يا ابني معلم فيها"
(طيب طيب – محمد فؤاد)

ده غير إني من ساعة ما شفت فيلم "Underground" من 3 أسابيع وأنا باسمع الموسيقى بتاعته بدون توقف. وحطيت أغنية منهم رنة للتليفون. حد ينقذني من نفسي!

صورة مش قادرة أشيلها من مخي اليومين دول:

أنا...في العربية لوحدي والدنيا بليل وبرد...ماسكة الموبايل في إيدي ومتضايقة أوي وباعيط...وعماله أفكر أكلمه وإلا لأ...وفجأة الموبايل يرن وألاقيه هو...وأول ما يسمع صوتي ويعرف أنا فين يقول لي: خليكي عندك أنا جايلك...ويرجع من على طريق مصر اسكندرية الصحراوي علشان يقعد معايا خمس دقايق ويقول لي: ما تزعليش..كله هيبقى كويس.

فكرة مسيطرة عليا اليومين دول:

إني لو قعدت أعيط لمدة ساعتين يوم واحد بس في الأسبوع (نقول يوم الأحد لإنه عادةً بيبقى يوم خنيق...بلاش في وسط الأسبوع وبلاش في الاجازة) هابقى كويسة أوي لباقي الأسبوع وأعصابي مستريحة، بدل ما اقعد اكتم في نفسي وانفجر لسبب تافه.

حاجة ندمانة عليها (مش أوي يعني):
في وقت ما كان يستحسن إني ألجأ لطبيب نفسي لكني فضلت أعالج نفسي بنفسي. ساعات باحس إني نجحت في علاجي...عملت شغل مش بطال والله...وساعات تانية باحس إن كام حباية مضاد للاكتئاب على كام مهدئ على كام جلسة عياط عند الدكتور النفساوي كانوا برضه هينفعوا.

ناس يا ريت يكتبوا حاجاتهم و محتاجاتهم:

سامية، مها، ديدو، إيف، ابن بطوطة، يسرا، واحدة مصرية