"إنت ليه مش بتمسك إيدي وإحنا ماشيين في الشارع؟"
"لأ بلاش...افرضي حد من قرايبك شافنا؟ والا حد من أصحاب أخوكي في الكلية؟ إن شاء الله يا حبيبتي بكره نتخطب وامسك إيديكي ادام الدنيا كلها".
.................................
"إنت ليه مش بتمسك إيدي وإحنا ماشيين في الشارع؟"
"علشان مش عاوز حد يفتكر إننا علشان اتخطبنا هنصيع بقى ونعيش حياتنا...وبعدين بصراحة كده أنا مستحرم...إن شاء الله بكره نتجوز وامسك إيدك وإنتي مراتي حبيبتي في الحلال".
.................................
"إنت ليه مش بتمسك إيدي وإحنا ماشيين في الشارع؟"
"يا حبيبتي إحنا مش مراهقين بقى هنمسك إيد بعض في الشارع وكده...إحنا اتنين متجوزين ومحترمين وعندنا بيت نعمل فيه اللي عاوزين نعمله".
.................................
"إنت ليه مش بتمسك إيدي وإحنا ماشيين في الشارع؟"
"يعني امسك إيدك والا امسك إيد البنت والا اشيل الأكياس دي كلها؟!"
.................................
"إنت ليه مش بتمسك إيدي وإحنا ماشيين في الشارع؟"
"إيدك إيه بس اللي هامسكها دلوقتي! إنتي عاوزه جوز بنتك يقول علينا كبرنا وخرفنا؟!"
.................................
"أنا بس كان نفسي تمسك إيدي وإحنا ماشيين في الشارع...عادي يعني...من غير مناسبة أو هدف محدد...بس تمسك إيدي...ماكنتش عاوزاك تمسكها علشان تسندني أو علشان أنا مش قادرة أمشي لوحدي مثلاً...أو علشان ده الصح اللي مفروض تعمله مع مراتك وهي عيانة...ولا علشان...زي دلوقتي...أنت خايف لو سبتها وقمت هاموت...لأ...تمسك إيدي علشان أنت عاوزها تفضل في إيدك...بس".
Thursday, December 08, 2005
أسباب بسيطة
Subscribe to:
Post Comments (Atom)
ما هو مش ممكن كل ما تكتبي ندخل هنا و نقول حلو قوى و جبار و عظيم و أموت أنا و الكلام ده.
ReplyDeleteيوه! طب لو مش عاجبك قول يا تنين! ما تقول ;)
ReplyDeleteتصدق إني بقالي فترة فعلاً بأفكر أشيل حكاية التعليقات دي؟ ولو حد استبد به الشوق إنه يقول لي حاجة يبقى يبعتها إيمايل يعني. قلت كده لواحد صاحبنا قال لأ ما تعمليش كده...هأحس إنك مغرورة! ما حبتش أقول له إني أصلاً من غير حاجة مغرورة :PPP
صباح الفل :)
يا سلام يا سلام يا حلاوة يا حلاوة :)
ReplyDeleteبس خلاص
:))))))
ReplyDeleteفعلا نهتم كثير بما يراه الناس اكثر مما نهتم بمشاعرنا
ReplyDeleteوالناس تهتم بما نفعل اكثر مما تهتم بما نشعر
ماذا يحدث لو اهتم كل بنفسه وباحساسه ولغى رقابته للاخرين
بيتهيالي دنيتنا هتبقى احلى كتير
الله..
ReplyDeleteسلمت يداك أمسكها أم لم يمسكِ
لا يا رحاب، تشيلى حكاية التعليقات إيه بس
ReplyDeleteو انا لمّا أحب أعبرلك عن مشاعرى، أقولها فين؟ فى إيمايل؟ لأ يا ستى
مشاعرى ليكى لازم تبقى على الملأ كدة زى ما هو المفروض يمسك إيديها :)
دة حقك
aياه ع السؤال نفسه رغم تركيبته البسيطة
ReplyDeleteالغريب انه دايما بيرد عليه
جميل أوى
انا حأعمل بعد كده جملة رسمية ارد بيها دايماً بدل ما كل مرة أتثبت و معرفش أجيب كلام...
ReplyDeleteتحفة بجد !!
sigh! :)
ReplyDeleteياساتر يارب
ReplyDeleteحلوه وجمبه وكل حاجه بس سوداويه ياستى
مخرجنيش من المود بتاعها غير "ماتسيبيه يمسكها يافوزيه يمكن تطرى"
يا رحاب يا بنتي ... الله ينور عليكي ..
ReplyDeleteيسعدني أهديلك أي أغنية لأسمهان من على موقع مزيكا .. ويحضرني أغنية "دخلت مرة ف جنينة"
.. يعني .. بما إني النهاردة دخلت في جنينتك.
تحية عطرة
محمود
روعة
ReplyDeleteنفسى اقدر امسك التفاصيل الصغيرة الكبيرة زيك بس مشعارف
انا عارفها وحاسس بيها بس مشبقدر اطلعها كلام
بس ساعة ما بقرالك
بنط واقول اهى هى دى
روعة بجد
this is my mail joujou_bekh@hotmail.com 3ashan teb3atili w a3raf mailek w lama te7remina mn el ta3li2 3al blog nela2i 7aga newsalek biha 2ew3i te3meli keda ya Hadouta :) ama 3an mawdou3 mask el 2eden fa .....zay ma katabti bel zabt :)
ReplyDeleteخايف أكون زيه
ReplyDeleteبس والله هي اللي كانت بتسحب ايدها من يدي وأنا مليش ذنب
طيب أعمل ايه
أمسكها تسحبها
أسيبها تزعل
بس يا رحوبه بلاش فضايح تاني
والنبي بلاش واستري علينا
دا احنا رجاله برضه
يااااه، فكرتيني بأغنية أنغام الأخيرة "بحبك وحشتيني" وحاجات صغيرة بتفرق أوي.. مع إنها عندهم مش مهمة ده إذا أدركوها..
ReplyDeleteTwenty years ago,when I was newly married, my husband was holding my hand in the street and we were going to be arrested by the police (I live in a one of the Gulf countries). He could not believe we were married.
ReplyDeleteI will never forget that day!
I loved your post..and I like your blog ..a lot.
جميلة الفكرة دي و بسيطة
ReplyDeleteأحمد شوقش
bravo Rehab, excellent as usual
ReplyDeleteInstead of praising you here, i do among friends cuz yr posts get stuck in my memory for a while..
ReplyDeleteThis one ba2a touched me cuz I have a problem with men who denounce public affection.. wa bel taaly my comment is
يسلم فمك يا بيري
بسيطة جدأً و فى الجون... اذا لم تعتبري لفظ بسيطة اهانة... اسمحيلي اعدي كل شوية اطمن اذا كان مسك ايدك و لا لسة... والله جامدة
ReplyDeleteملعوبه
ReplyDelete-إنت ليه موش بتمسك ايدي ف الشارع
ReplyDelete- صمت
انا نفسي ف كده -
- و هو انا لازم اعمل كل حاجة انتي نفسك فيها ؟؟؟
رحاب.. يمكن أكون متأخرة قوى... بس بجد بقالى كتير معرفش أى حاجة عن المدونات الا طشاش كدة...
ReplyDeleteالصراحة أنا إحتجت أقرأ الكلام مرتين -رغم سهولته اللى تدخل القلب على طول كدة- بس عشان أقدر أستوعبه وأقدر أفوق من الصدمة وأعلق.. بس بردو مفيش عندى كلمة أقولها غير
i raise the hat for your gentle words :)
نهارك سعيد
مراحل مسك الايدين فيما قبل الزواج و بعد الزواج و بعد الخلفه معتقدات خاطئه الأفضل ان نمسك ايدينا طيلة العمر فى الشارع او فى البيت او فى العمل ا....احساس لذيذ بالأمان
ReplyDeleteسلام
ReplyDeleteفقط رائع
Wonder how would this post be when you just reverse the gender, I mean if 'she' was the one who would decline to 'touch' his hands for the same 'simple' reasons!!!! A thought to ponder upon...
ReplyDeletelovely !!! Especially the last paragraph, right to the point!
ReplyDeleteMissed you my friend,
Maysoun Saadi
Rehab, your writing is very touching. I found myseld laughing then crying then laughing again. You have amazingly sensitive and genuine feelings. Thank you for writing.
ReplyDeleteكل يوم بعدي على المدونة
ReplyDeleteوابص على ايدها وهي بتقرب من يده
واول ما تلمسه
يقوم ساحبها بسرعة
وحاططها في جيوبه
بخيل قوي
هي حلوة و ملعوبة و في الجون مفيش اعتراض. بس الحكم كان لازم يشوف اللعبة من الناحية التانية. الرواية بتقول هو جه يمسك إيديها سحبت إيديها و قالت عيب كده الناس تقول ايه!!
ReplyDeleteعموما أنا معرفش أمسك إيديها الجو برد و ايديا في جيوبي على رأي منير برد مونتريال يحكم برضه!!
برضه لسة هعدي بكرة كمان وأشوف
ReplyDeleteأوعى يكون عاجبك تعاطف الناس معاكي
وكله عمال يقول جميل
وحلو
عايزين نشوف وصال
ولمسة ايديهم تدفي قلوبنا في ليل الشتا البارد
درش...صباح الفل :) فعلاً...لو بس الناس تبطل تعين نفسها ظباط شرطة على المشاعر والأفكار...باحس ساعات إن الناس مابقتش تعرف تستمتع بحاجة من غير ما تقول لك: بس لو كنت جبتها يمين شوية...بس لو في منها منقط...بس لو كنت أنت نفسك بس على مخطط...حاجة تخنق
ReplyDeleteدعاء...هي الدنيا إيه غير سلسلة من الحاجات الصغيرة اللي بتفرق أوي :)
أبو شنب...تعاطف الناس معايا إزاي؟ أنا مش باعرض مشكلتي في برنامج حياتي...ولا فاتحة المدونة مؤسسة خيرية للي عايز يتبرع ولو بجنيه :)
حازم وعلاء الدين...أهلاً وسهلاً...للأسف الشديد أنا مش باعرف اكتب غير اللي بيجي لي وباحس به...الحمد لله إني عديت مرحلة مواضيع التعبير اللي بتفرض عليا اكتب من وجهة نظر معينة...اللي عاوز يشوف الموضوع من الناحية التانية يكتب هو عنه :)
شوقش...المدونة نورت...بس مستنية رأيك اللي بجد في الحاجات اللي أحسن من دي :)
Faraway...i didn't like "Mars & Venus"...too stereotyping...and pretending to give you the secret of life :) I cannot go to sleep without reading, and I'm an insomniac, do the maths and you'll understand how I manage to read a lot :)
شكري وتحياتي لكم كلكم :)
يا رحوبة أنا مقصدش اللي فهمتيه
ReplyDeleteأنا أقصد تكتبي لنا حاجة جديدة
نستمتع بيها كلنا
حاجة تحسسنا بالدفا
نشوف اتنين بيحبو بعض وماشيين
واخدين طريقهم
متعشقين
زي قزاز الشبابيك
في منزل زينب هانم خاتون
بس بجد أنا اتخضيت من تعليقك
حسيتك رفعتي حاجب ونزلتي التاني
وقمتي مزعقة فيا
زي المدير بتاعي ما بيعمل دايما
تحياتي
انتو مال اهلكم
ReplyDeleteما تكتب اللي هيه عايزة تكتبه
واللي حاسة بيه
يعني عايزينها تحس باللي انتو عاوزينه
رقابة عامة
بلاش تعليقاتك يا ابو شنب
كفاية الاخوان المسلمين
امممممم مش عارف ليه مش كنت عايز اعلق ف الاول بس عموما هقول رايي و السلام هو الاسلوب مكرر شويه يعني اقصد ليه انتي مبتعملش كذا ؟ عشان كذا و تكرار السؤال علي فترات زمانيه مع اختلاف الرد قريت حاجات كتير بنفس الاسلوب بس اللي يميزك هنا انك ليكي اسلوب لذيذ بيجمع بين متناقضات احيانا يعني انا حاسس معاكي الدلع و الجديه سوا مع بعض و ف نفس الوقت
ReplyDeleteلكن بالنسبه للمضمون بقي و سؤال انت ليه مش بتمسك ايدي ؟ مش عارف مش متصور ان فيه حد بيحب واحده من غير ما يمسك ايديها ممكن مبيمسكش ايدها بحنان و فيه فرق كبير بين انه يمسك ايدها عادي او يمسكها بحب و حنان بس لو مش بيمسك ايدها بجد الفتره دي كلها يبقي هي غلطت اها عاشت معاه
الا طبعا لو عندها امراض معديه او جربانه مثلا يبقي معاه حق ايه تاني ايه تاني بس مفيش كفايه كده لما افتكر هبقي اكتب تاني
رحاب
ReplyDeleteيبدو من ردك أنك أخطأت قراءة تعليقي. طبعا كلنا نكتب ما نشعر به و ندون ما يتقافز في عقولنا و صدورنا. أنا فهمت من قراءة التدوينة الأصلية إنها كانت تعبير عن أحاسيس رقيقة, وضعت تعليقي ليس للمطالبة بأن تكتبي موضوع تعبير محدد، أردت أن ألفت نظر من يقرأ إلى نصف الكوب الفارغ.
يبدو لي أن شم الورد يجعل الإنسان أكثر هدوءا و تقبلا.
لماذا نترك مساحة للزائرين لتدوين تعليقاتهم؟ هل فقط ليقولوا برافو؟!!
عموما يا ستي حصل خير، كان الود أجيب وردة علشان تروقي و تتحفينا
تحياتي
طبعا تعليق باثر رجعي بس معلش كويس انك لسه منزلتيش حاجة جديدة و كمان نلحق نقولك
ReplyDeleteكل سنة وانت طيبة" ماري كريسماس"
عارفة فكرتيني بحكاية قديمة
واحدة كانت كل ما تشوف وش جوزها تقوله : انا بحبك !!
فكان يهز دماغه ويبتسملها ويسكت
قبل ما تموت قلتله : انا بحبك !!
فالراجل من شدة تاثره قالها : وانا كمان
فضحكت وصرحت له لاول مره ان الكلمة ديه هي اللي كان نفسها تسمعها من زمان
وسحبت ساحبة طويلة وراحت المشوار البعيد
مش عارف ليه كل ما افتكرها بقعد اضحك
لا مش فكرة اني معنديش دم
بس فعلا شر البلية ما يضحك؟؟
وعجبي
حازم...أنت بتخلط بين موضوعين: تقبلي للنقد (كتابتك هايلة...كتابتك زي الزفت) وبين إن حد يقول لي اكتب إزاي وإيه...في أكتر من موقف الناس علقت تعليقات سلبية وأنا لا مسحت التعليقات ولا حتى دافعت عن نفسي لإني مقتنعة إن كتابة الأدب أو قراءته تجربة ذاتية جداً...زي ما أنا حرة اكتب اللي اكتبه...الناس حرة يعجبها أو ما يعجبهاش اللي بتقراه
ReplyDeleteيمكن فعلاً أكون ما قريتش تعليقك صح...بس أنا حبيت أوضح نقطة برضه
شم الورد أكيد بيخلي الواحد أكثر هدوءاً لكن اللي يضايق لما حد يقولك تشم إيه وإزاي :)
زي ما أنت قلت...حصل خير...أنا انهيت تعليقي الأول بابتسامة لإني فعلاً ما اتضايقتش للدرجة اللي أنت فاكرها...الحكاية أبسط من كده بكتير :)
أبو شنب...أنا كنت رافعة حاجب ومنزلة حاجب فعلاً...بس كنت برضه مبتسمة :)
هو حنفى كان يستجرى يمسك ايدى طب دانا كنت اقطعهاله.........هو مامسكهاش لحد دلوقتى؟؟؟؟؟!!!!
ReplyDeleteسيبيه يمسكها يا فوزية........
إيه الجمااااااااااال ده؟؟؟؟!!! بجد روعة أوي و إحساس فظيع!! أعذريني لو كان تعليقي عادي بس دي أول مرة أدخل على البلوج بتاعك بعد ماشجعتني فقرتك الهايلة في تياترو زرياب و أكييييييييد
ReplyDeleteأكيد مش أخر مرة.أرجوكي متلغيش التعليقات!! و على فكرة إنت عندك حق تبقي مغرورة قوي كمان
عندك حق يا رحاب
ReplyDeleteالتطور ده متكرر في كثير من العلاقات بين الجنسين
مش عارف ليه بجد
وكمان سؤال تاني يا رحاب: انت ليه قاعد ساكت؟
ReplyDeleteمش لازم اتكلم طول الوقت يعني ممكن نقعد ساكتين، ويفضلواساكتين على طول.
حلوة :-)
خطوة عزيزة يا ست نعامة :) السؤال بتاع إنت ساكت ليه أو ساكتة ليه ده مستفز جداً جداً جداً...سواء منها أو منه أو من أي حد
ReplyDeletebravo! well written!
ReplyDeleteالله..... حلوة أوي، من زمان ماقريتش حاجه حلوة
ReplyDeleteحلوة أوي تسلم ايدك
ReplyDelete
ReplyDeleteحوار بين واحد و واحدة
يا ستي تعالي وانا هافضل ماسك ايديك طول اليوم
ReplyDeleteوحشتيني احبك
ReplyDeleteاكتب اليك من خارج حياتك
عزة
باختصار
ReplyDeleteرائعة
هادفة
وخصوصاً السطرين الخلاصة لاصة إللى في الاخر
kessa wake3eyah gidan we fe montaha elgamal ka2enek betewsafy 7aly tamam ,bas ana lesa feh mar7alit elkhotoba hahaha
ReplyDelete3ala fekrah ana monbaher bekhayalik we ebda3atik, we ya rab te2balony sadek ma3akom
esmy islam , petrolem engineer, alexandria , geoetman@hotmail.com . we insha2 allah 7atabi3 mawke3ik bestemrar
we elsalam khetam.........
very nice post..this what differs us from men!!
ReplyDeleteتسلم ايدك وعلي فكره مش كل الرجال مبيحبوش كده يعني .في ناس والله زي العسل وكوويسين
ReplyDeleteتصاعد زمني جميل وسلس
ReplyDeleteصاحبه حوار قصير شبه متشابه
على محطات زمنية مختلفة في حياة بطلة القصة
إلى أن وصلت الكاتبة ببطلتها إلى محطتها الأخيرة
كما وصلت بنا أيضاً إلى نهاية القصة في محطتها الأخيرةوفي المعنى المقصود والمنشود
( المستحقات العاطفية)
فلكل منا مستحقاته العاطفية
ولكن هذه المستحقات نرفض أن نأخذها في ،محطتنا الأخيرة
نرفض أن نطلبها، نرفض أن تأتي إلينا عن غير طيب خاطر، نريدها طواعيهً من القلب ومن الجسد كله نريدها في كل المحطات من أول الخط إلى
نهايته
حسن أرابيسك
ههههههههههههههه
ReplyDeleteااقوللك ايه بس ..
ضحكتينى من قلبى ..وشلتى عنى كام هم كده ..وهاتخلينى انام وانا مرتاحة
وبقول الدنيا لسه فيها ناس بتفكر
وناس بتقول..
قولى بقى واحكيلنا كمان وكمان
أنا قريت البتاعة دي قبل كدة بس لما لقيت الفقرة الأخيرة اللي إنتي كتبتيها ... عجبتني ... فيها إحساس مش أي حد بيحسه ...
ReplyDeleteتلاقيه شاف مسرحية سك على بناتك ... سيبيه يمسكها يا فوزييية :)
رحاب تعليقاتى متأخرة أوى بس بجد أسلوبك روعة ومعبر جدا أنا لسة فاتحة مدونتك انهاردة بس عجبنى أسوبك الأدبى السهل الراقى وفى نفس الوقت بيعبر عننا كلنا
ReplyDeleteبالتوفيق
عجبتني جدا ...
ReplyDeleteالحكاية كلها هل هو محتاج يمسك إيدها زي ما هي محتاجة إيده تحضن إيدها ؟؟؟
تحياتي
إنت ليه مش بتمسك إيدي وإحنا ماشيين في الشارع؟"
ReplyDelete"إيدك إيه بس اللي هامسكها دلوقتي! إنتي عاوزه جوز بنتك يقول علينا كبرنا وخرفنا؟!"
رحاب تعليقاتى متأخرة أوى بس بجد أسلوبك روعة ومعبر جدا أنا لسة فاتحة مدونتك انهاردة بس عجبنى أسوبك الأدبى السهل الراقى وفى نفس الوقت بيعبر عننا كلنا
ReplyDeleteبالتوفيق
تصاعد زمني جميل وسلس
ReplyDeleteصاحبه حوار قصير شبه متشابه
على محطات زمنية مختلفة في حياة بطلة القصة
إلى أن وصلت الكاتبة ببطلتها إلى محطتها الأخيرة
كما وصلت بنا أيضاً إلى نهاية القصة في محطتها الأخيرةوفي المعنى المقصود والمنشود
( المستحقات العاطفية)
فلكل منا مستحقاته العاطفية
ولكن هذه المستحقات نرفض أن نأخذها في ،محطتنا الأخيرة
نرفض أن نطلبها، نرفض أن تأتي إلينا عن غير طيب خاطر، نريدها طواعيهً من القلب ومن الجسد كله نريدها في كل المحطات من أول الخط إلى
نهايته