معلش يا غادة...أنا مش هاقدر اكتب عن سبع حاجات بظبط. أنا دماغي سايحة على بعض الأيام دي...ده غير إني أصلاً مش بحب رقم سبعة.
حاجات نفسي أعملها:
- اكتب كتاب يكسر الدنيا (زي نايتي بظبط) ويبيع كتير ويبقى عندي فلوس تكفي اشتري كوخ على البحر في حتة مهجورة بس البحر بتاعها يكون حلو واعيش هناك اكتب واقرا واترجم واسمع مزيكا وارقص وبس.
- ابقى أحسن واحدة تعمل ورق عنب في العالم
- اتعلم ارقص سالسا وميرينجي وباتشاتا كويس جداً
- اخلص كل الكتب اللي عاوزة اقراها
- اخلص الماجيستير...أو بالأصح ابدأ فيه
- ما اتكسفش اتكلم فرنساوي ادام الناس...واتعلم أسباني بجد مش بالفهلوة
- اقضي شهر بألف أوروبا
حاجات باعرف اعملها/بحب اعملها:
- الكيك بأنواع مختلفة
- لما باطبخ...باطبخ حلو
- أقول نكت
- ارقص بلدي
- اعمل من الفسيخ شربات واحل مشاكل ناس تانية بمنتهى السهولة (ويجيلي شلل عقلي عند أبسط مشاكلي)
- احكي حكايات...ولو الناس سابتني ممكن اقعد اتكلم بدون توقف لساعات
- اعمل مؤثرات صوتية وأنا باحكي الحكايات (طاخ...تش...تك تك تك...تي تي تي...عاااااا...تيكيلم تيكيلم)
- اتفرج على أفلام مختلفة ورا بعض في السينما من أول اليوم لآخره
حاجات مش باعرف أعملها:
- اتحكم في تعبيرات وشي
- ورق العنب
- أنام 4 ساعات متواصلة...أنا باقلق من النوم بمعدل مرة كل ساعتين
- اعزف بيانو بالنوتة الموسيقية...باعزفه سماعي بس...بعد سنين وسنين من التدريب!
حاجات بتقلقني:
- قياس محيط الوسط بتاعي
- ألاقي ماما صاحية لما ابقى مروحة متأخرة
- ما الحقش اعمل كل الحاجات اللي عاوزه اعملها
- يطلع في رادار وأنا سايقة بسرعة ويسحبوا مني الرخص
حاجات بأقولها دايماً:
- يا مصيبتي (تُنطق "يا مسيبتي")
- أموت أنا! (تصاحبها غمزة أو تلعيب حواجب)
- ياااا حالوللي!
- يا حياتي (أيوه يا حياتي...نعم يا حياتي...لأ يا حياتي)
- إشمعنى؟
حاجات مش عارفه الناس إزاي بتقدر تعملها:
- تنام من غير ما تغسل رجليها وسنانها وتلبس هدوم نضيفة
- تنام 8 أو 9 أو 12 ساعة متواصلة
حاجات ما أظنش إنها هتتغير فيا أبداً:
- العند...العند...العند (صوت راس بتخبط في الحيط)
- افتكر حوارات بالكامل وافتكر كمان الناس كانت لابسة إيه لما قالتها
- الهرتلة...تخيلوني كده...تيتة رحاب المهرتلة :)
- إني ابقى حساسة أوي...حاجات صغيرة جداً تخليني تعيسة وحاجات صغيرة جداً تخليني أسعد واحدة في الدنيا
أغنية لازقة في دماغي اليومين دول:
أولاً هي بترقّص أوي...ده غير إنها جامدة:
"جرب من اللي أنا دقته معاك
بكره هتمشي تبص وراك
وهتتعذب...اتقل اتقل...إوعى تفكر إني ملاك
لا يا حبيبي أنا هاقسى عليك
بكره تشوف الويل بعينيك
مش هاتعاتب ولا هاتكلم...وقت عتابك عدى عليك
طيب طيب صبرك حبة...ما عرفت خلاص إيه فيها
أستاذ في القسوة لكن على مين...ده أنا يا ابني معلم فيها"
(طيب طيب – محمد فؤاد)
ده غير إني من ساعة ما شفت فيلم "Underground" من 3 أسابيع وأنا باسمع الموسيقى بتاعته بدون توقف. وحطيت أغنية منهم رنة للتليفون. حد ينقذني من نفسي!
صورة مش قادرة أشيلها من مخي اليومين دول:
أنا...في العربية لوحدي والدنيا بليل وبرد...ماسكة الموبايل في إيدي ومتضايقة أوي وباعيط...وعماله أفكر أكلمه وإلا لأ...وفجأة الموبايل يرن وألاقيه هو...وأول ما يسمع صوتي ويعرف أنا فين يقول لي: خليكي عندك أنا جايلك...ويرجع من على طريق مصر اسكندرية الصحراوي علشان يقعد معايا خمس دقايق ويقول لي: ما تزعليش..كله هيبقى كويس.
فكرة مسيطرة عليا اليومين دول:
إني لو قعدت أعيط لمدة ساعتين يوم واحد بس في الأسبوع (نقول يوم الأحد لإنه عادةً بيبقى يوم خنيق...بلاش في وسط الأسبوع وبلاش في الاجازة) هابقى كويسة أوي لباقي الأسبوع وأعصابي مستريحة، بدل ما اقعد اكتم في نفسي وانفجر لسبب تافه.
حاجة ندمانة عليها (مش أوي يعني):
في وقت ما كان يستحسن إني ألجأ لطبيب نفسي لكني فضلت أعالج نفسي بنفسي. ساعات باحس إني نجحت في علاجي...عملت شغل مش بطال والله...وساعات تانية باحس إن كام حباية مضاد للاكتئاب على كام مهدئ على كام جلسة عياط عند الدكتور النفساوي كانوا برضه هينفعوا.
ناس يا ريت يكتبوا حاجاتهم و محتاجاتهم:
سامية، مها، ديدو، إيف، ابن بطوطة، يسرا، واحدة مصرية
تصدقي انك ممكن تكوني الرغاية الوحيدة الي ما بزهقش منها مهما أتكلمت!! على فكرة أنا أحسن واحدة بتعمل ورق عنب في العالم وممكن أعلمك
ReplyDeleteعامة انا مستنى الكتاب اللى واثق انه هيكسر الدنيا
ReplyDeleteبالنسبة للدكتور النفسى ده
ناس كتير مروا بتجربة علاج نفسهم ولو بالورقة و القلم
لأ يا رحاب لأ لأ لأ! حرام عليكي. إنت عارفة اني ماليش في الحاجات دي..ده غير إني عندي تلال من الشغل اللي مش راضي يخلص! معلش والنبي إعفيني المرة دي. ده أنا بقالي أسبوع أصلا بحاول أكتب حاجة ومش عارفة ف بجد معنديش وقت أقعد افكر فأم سبعة وسبعين دي
ReplyDelete:D
ملاحظة: عايزين نشوف
ReplyDeleteunderground
تاني عشان المرة اللي فاتت خالد ومها وأسامة كانو بيضحكوني
ألكس يا حياتي...أنا وانتي آخر اتنين نتكلم عن الرغي...آخر مرة كنا سوا صحيت الصبح صوتي رايح أصلاً...وأكتر حاجة بتغيظ إن كل مرة بعد ما بامشي باقعد أقول ياه! أنا ما كملتلهاش الحكاية دي! ياه! دي ما كملتش الحكاية دي! ياه ده أنا نسيت أحكيلها على كيت وكيت! :)) هاجيلك والله العظيم مرة تعلميني ورق عنب ونتفرج على ناجي العلي ونروق المكتبة ونشرب شوكولاتة سخنة...حاسة إني محتاجة اقضي عندك أسبوع مش يوم :))
ReplyDeleteسامية...أحمدك يا رب...أول مرة أكون مش أنا السبب في تبويظ الفيلم على حد!! أيوه عاوزين نشوفه تاني علشان نفهمه بقى المره دي :) هاموت وأعرف الحصان الأبيض ده كان تبع إيه!
أوبيوم...لا ملايكة ولا حاجة...أنا أبسط من كده بكتير :)
هيستريا...لا والله الدكتور برضه كان هيظبط كام صامولة هنا وهنا :)
معلش .. أحب أضيف إنك بتعرفي تعملي رز بلبن؟؟ ولا كنتي بتخدعينا .. ده أنا جالي هاجس إن انتي بس اللي بتعرفي تعملي رز بلبن .. أتمنى دي ما تكونش خدعة
ReplyDeleteأيوه طبعاً باعرف أعمل الرز بلبن! بس مش معقولة كل تدوينتين اقعد أقول رز بلبن رز بلبن رز بلبن واغيظ الناس كده :)
ReplyDeleteاللـــــــــه.. عوْدٌ (حميم) يا رحاب
ReplyDeleteawel ta3li2,7asaki shabahi awy, ketir lama ba2ralek ba7es nafsi fel 7agat, tani 7aga ana f alson aspani w ba7'od corsat fel markaz el sakafi el aspani w ma3andish ay mane3 a3alemek, ya2tini el sharaf :),w momken asma3ek w enti betekalemi francais w ashaga3ek, talet 7aga ana kaman nefsi at3alem salsa w ra3'aya zayek tamam.....msh 3arfa a2olek eh 3'er fe3lan matet2a7'arish 3alena fel ketaba
ReplyDeleteعمر...إزيك كده؟ :) مستنية حفلة الجميزة الجاية :)
ReplyDeleteجولي...يا جولي!! كل مرة ابقى عاوزه ارد عليكي اكتشف إني مش عندي الإيمايل بتاعك...الله يخليكي ابعتيهولي...اما بالنسبة للأسباني...أنا ممكن أغني أسباني وافهمه طشاش لكن الدروس طبعاً هتبقى أفيد بكتير :)
"الحصان الأبيض ده كان تبع إيه!"
ReplyDeleteهوا الفيلم كان فيه حصان أبيض؟
كوكي....ماهو كلهم بيقولوا كده في الأول...السالسا سهلة والميرينجي سهل والباتشاتا سهلة...وفي الآخر نرقص أنا وإنتي :))
ReplyDeleteمحمد!! إوعي تقول إنك ما شوفتش الحصان الأبيض؟!! ده من الألغاز اللي في حياتي
لأ بجد مش فاكره!
ReplyDeleteمع اني لسة شايف الفيلم من أسبوع
كان في أنهو حتة في الفيلم معلش؟
عجبني موضوع المؤثرات الصوتية في الحكايات ده.. أقول لك على سر؟ باحب أحكي لولاد خالتي الحواديت عشان أقعد أعمل الأصوات دي بحجة مقنعة!
ReplyDeleteحمد الله على سلامتك يا جميل.. أيوه كده سمعينا صوتك الدافي ده دايما..
:)
كتبت الحاجات والمحتاجات بتاعتي هنا:
ReplyDeletehttp://mysteriouseve.blogspot.com/2005/11/tagged.html
على فكرة، انت والكسندرا بالذات ما تتكلموش عن الرغي، ده أنا معاي أدلة وإثباتات. إستنّوا عليّ بس ;-)
يا محمد لو الذاكرة ما خانتنيش، الحصان الأبيض كان بيجري في الخلفية في المشهد الأسود بتاع الحرب في الآخر. المشهد ده إتقال فيه حتة جملة
ReplyDeleteA war is not yet a war until a brother kills his brother
حاجة كدة
آخ! اهو أنا كنت خايفة من الرد بتاعك يا إيف على موضوع الرغي ده! استري علينا الله يستر عليكي! :)))
ReplyDeleteمعلهش لم يكن لدى وقت للأستئذان انا اعجبت بقصتك ارز باللبن وساقدمها فى برنامجى يوم الخميس 5 يناير 2006 وكل تفاصيل عن البرنامج وميعاد الأذاعه فى الموقع التالى
ReplyDeletewww.ahram0505.net/users/alcomputer
أفندم؟! يعني إيه ما كانش في وقت لاستئذاني؟!!! ومين حضرتك مجهول الاسم؟؟؟ وبعدين الرابط بتاع البرنامج مش شغال...فمقدرش أعرف أنهي برنامج وإلا فين وإلا حتى اسمك علشان اقدر ارد عليك مظبوط
ReplyDeleteده تصرف غير مقبول بالمرة
ههههههه والله حاجه جامده وعلى العموم حسبى لتندمجى فى الفلام اوى لحسن نجيبك من القسم او المستشفى
ReplyDeleteرحاب يخرب عقلك كنت عاوز انام فقلت اشوف المدونة دي كلمتين كده على الطاير لكن للاسف اللي طار هو النوم من عيني انت رائعة بجد واجمل ما فيك عفويتك يارب تتعلى ورق العنب ونبقى صحاب وربنا يكرمك وتبقى تعملي لنا عزومة وحظك حلو انا عائلتي خمس افراد بس غير حماتي مش هاجيبها وناكل منك احلى ورق عنب ولا اقولك معلش انا احب اموت موتة ربنا احسن ههههه تحياتي وبجد انتي فتحتي نفسي للحياة ربنا يبارك فيك يا رورو وان شاء الله اشوفك في مدونتي المتواضعه
ReplyDeleteخطوة عزيزة يا عادل :)
ReplyDeleteصدقني يوم ما اتعلم ورق العنب هيبقى يوم تاريخي وهاعزم كل الناس على حلة ورق عنب افتراضية :)
انا جديدة على التعليقات بس مش جديدة على المدونة الروعة ومش عارفة ليه مكنتش بعلق قبل كدة
ReplyDeleteالمهم ان كلامك بجد بيدخ القلب..يمكن بسبب انه طالع من القلب
خليكي دايما كدة
نوعين من الأكل ما أحبهمش
ReplyDeleteأكل الأونطة ، وأكل حقوق الناس
وسيلتين من المواصلات ما أحبش اركبهم
بساط الريح ، وحصان طروادة
عمليتين في الحساب و الضرب معملهمش
ضرب واحد في واحد عشان عيب وضرب السجادة بالمنفضدة لما تقول يا بس .
بالنسبة للنظافة نوعين من المسح أكرههم
مسح الجوخ ، ومسح يزحلق
وضعين ما أقدرش أنام عليهم
فلوس واخدها من حد، وأمل كداب
نوعين من الحبوب ما ينفعش أزرعهم
حــب الشبــاب ، وحــب ولا طالش
هـهمتين محبهمش في الكلام
هم يا جمــل ، وهم برجــر
إتنين محبش سواقتهم
واحد سايق الهبل على الشيطنه، وواحد سايق فيها
ميزتين أحبهم في الآ آنا
analyze أناناس ، و
سكتين أحب أمشي فيهم
سكة السلامة ، وسكة ابو زيد عشان كلها مسالك
نوعين من الستات أحبهم وأموت فيهم
سته على سته، وسته ونص إلا خمسة
نوعين من العيون أحبهم بجد
عين الصيرة في مصر القديمة،وعين الشمس ما تحماشي
ونوعين من العيون لا أحبهم ولا أطيقهم
عين الحسود، وعين في الجنة وعين في النار
نوعين من الشعر ما أحبهمش
شعرة معاوية، وشعرة ساعة تروح وساعة تيجي
نوعين من الدهب أحبهم قوي قوي
دهب في سيناء، ودهب طارق علام
نوعين من الأهل مش موجودبن الأيام دي
أهل المغنى، وأهل السماح
حاجتين ما أحبش اتشعلق فيهم
الحبال الدايبة، والمواسير البايشة
حاجتين بحبهم في الجد
هالله هالله عالجد والجد هالله هالله عليه
حاجتين ما أحبش أدخلهم في بعش
التهريج في الهزار، وفردتين الشراب في
بعض
حسن أرابيسك
تصوري فكرة مجنونة وعبقرية إن الإنسان يستطيع أن يُخرج ما في جعبته في الهواء أي تجاه إناس لا يعرفهم، لكنهم في النهاية بشر لهم حواس كالتي أعرفها جيدا
ReplyDeleteوقد أُدمن ذلك وفي ذلك خطر شديد عليّ لأني عدو أن أدمن على شئ فأفضل شئ أن لا ستعبدك شئ، ولكن يبدو أننا أسرى للإدمان فنحن ندمن من نحب ويدمننا من يحبنا وعندي حوادييييييييييييييييييييييييييييييييييييييت كثيرة شريطة أن أشعر بأن من يكتب في صدق ما هو مطروح
تصوري فكرة مجنونة وعبقرية إن الإنسان يستطيع أن يُخرج ما في جعبته في الهواء أي تجاه إناس لا يعرفهم، لكنهم في النهاية بشر لهم حواس كالتي أعرفها جيدا
ReplyDeleteوقد أُدمن ذلك وفي ذلك خطر شديد عليّ لأني عدو أن أدمن على شئ فأفضل شئ أن لا ستعبدك شئ، ولكن يبدو أننا أسرى للإدمان فنحن ندمن من نحب ويدمننا من يحبنا وعندي حوادييييييييييييييييييييييييييييييييييييييت كثيرة شريطة أن أشعر بأن من يكتب في صدق ما هو مطروح
7elwa awyyyyyyyyyyyyyyyyy bgd ya r7ab :)))
ReplyDeleteasln feha 7agat kter shabahy aw bab2a 7assaha w kont fakra enny elwa7eda elly ba7essaha ....
if i was the one who's talkin mkntesh hakteb 7arf more or less...msa wahmeya:D
ReplyDelete