أليس حبِّت توضح الموضوع: "بس أنا مش عاوزه أبقى وسط ناس مجانين".
القطة المشمشي ردت: "ما في اليد حيلة خلاص. إحنا كلنا هنا مجانين. أنا مجنونة. إنتي مجنونة".
أليس استغربت جدًا وقالت: "بس إزاي عرفتي إني مجنونة؟".
القطة المشمشي اتنهدت وقالت بحكمة ولا مبالاة كعادتها: "إنتي أكيد مجنونة.. وإلا ما كنتيش جيتي هنا".
ترجمة بتصرف لقطعة من الفصل السادس من أليس في بلاد العجائب
لعل الحب هو أن تتعلم
أن تمضي عبر هذا العالم.
تتعلم أن تكون صامتاً
مثل شجر البلوط والزيزفون في القصص.
تتعلم أن ترى.
نظرتك نثرت بذوراً.
زَرَعَت شجرة.
أنا أتكلم
لأنك تهز أوراقها.
--محاولة لترجمة أبيات من قصيدة لأوكتافيو باز
أليس قالت تسأل القطة المشمشي لإن باين عليها بتفهم: "ينوبك ثواب...تقدري تقوليلي آخد أنهي سكة علشان أطلع من هنا؟"
القطة المشمشي ردت على أليس رد مُفحِم: "والله ده يتوقف على إنتي عاوزه تروحي فين أصلاً".
"مش فارقة معايا أوي الصراحة..."
"يبقى مش هتفرق معاكي السكة اللي هتاخديها".
أليس اتخضت: "أيوه...بس أنا عاوزه أطلع من هنا، وأوصل في الآخر لمكان معين يعني!"
القطة المشمشي ضحكت كده وقالت: "ما تخافيش...أكيد هتوصلي في الآخر لمكان معين...لو مشيتي كفاية".
________
ترجمة بتصرف لـقطعة من الفصل السادس من "أليس في بلاد العجائب" للويس كارول.
