Sunday, May 28, 2006

تناتيف من غزل البنات


أقف في وسط الشارع أمام الأكياس الوردية والزرقاء وأقرر: "عاوزه غزل البنات" فيشتري طارق لنا جميعاً غزل البنات. نسير في شوارع وسط البلد متلذذين بالسكر الهش، منبهرين بتحطيم أحد المحظورات وشراء غزل البنات "من الباعة الجائلين". يقتسم طارق كيسه مع بائع للجوارب وآخر للساعات الصينية، ونكمل طريقنا بتمهل رغم أن على أغلب البنات الإسراع للحاق بآخر "شبشب" في البيت. تقترح هبة أن نتفق يوماً على أن نتوه سوياً في وسط البلد فأوافق فوراً.

وسط البلد بعد الحادية عشرة مساءً وبعد حفل في التاون هاوس ووسط مجموعة—مختلفة جداً ولكن متشابهة جداً—من أقرب الناس إلى قلبي وأناس آخرين أعرفهم بالكاد. في أجمل من كده؟ أتذكر أن في مكان قريب منذ عدة أسابيع أخذوا علاء وآخرين. آخر مرة كنت عند منال وعلاء في البيت جلس ثلاثتنا لأكثر من نصف ساعة نتحدث عن موضوع يهمنا للغاية: القطط. أخذنا في تبادل النوادر القططية بينما جلست قطتهم "كبسولة" على رجلي تنظر لي بوَله ولا مبالاة في نفس الوقت. تبهرني هذه النظرة لدى القطط، يبدو لي وكأنهم يقولون: "حِبّني! حِبّني حالاً! لكن لو ما حبتنيش مش مشكلة، طز فيك، أنت أصلاً ما تستاهلش إنك تحبني". أهداني علاء يومها أسطوانة مدمجة عليها مجموعة ضخمة من القصص المصورة الأجنبية ليعالج جهلي بهذا الفن، رغم أنني طلبت منه فقط قصص بطوط وسونيا وعم دهب.

من منال وعلاء أتذكر محمد عندما رأى صورة "أوز-أوز" قطي الجديد: "شكله شرير...مش مستريح له"، ومن وقتها وأنا لا أحب هذا القط. ربنا يسامحك يا محمد!

بين العمل، والكورسات، والتاون هاوس، والساقية، والأصدقاء، والبروفات، والترجمة...تمر الأيام. هناك شيء قاسٍ جداً في مرور الأيام بمنتهى العادية. إيه الدنيا دي؟ لماذا لا تتوقف وينقلب كيانها لتشاركني حزني؟ هل هي حقاً لا مبالية؟ أم هي مثلي: تستيقظ كل يوم وتمارس حياتها العادية وتحاول ألا تتوقف عند ما يؤلمها؟

عند مفترق طرق تهل علينا رائحة الفُل فأنسى أن أعبر الشارع. أقف على الرصيف أنظر حولي، وإذ بسيدة في سيارة بطيئة للغاية تلوح لي وللكهل الواقف بجواري بعصبية شديدة: "وسعوا! وسعوا!" لا نعيرها اهتماماً (فنحن نقف على الرصيف، نوسع نروح فين؟) ولكن بعد أن تمضي يبدأ الكهل في سبها: "يا بنت وبنت وبنت! فاكرة نفسك راكبة طيارة؟!"

أسير مع أصدقائي وأنا أدندن بالـ"الليلة الكبيرة". تظن أن شخصاً ما لديه بعضاً من نور ونار، ثم تصحو في يوم لتكتشف أنه مجرد قطعة أخرى من الطين. ومع ذلك يمكنك بمنتهى السهولة أن تجد مئة سبباً لتحب شخصاً ما، كما يمكنك في نفس الوقت أن تجد مئة سبباً لكراهيته، إذا أردت...إذا أردت.

تنقذني القراءة و"Friends". في أسبوع واحد أنتهيت من ثلاثة كتب وشاهدت أول موسمين، وعندما أكتشفت (وأنا في أول موسم) أن الموسم العاشر لا يعمل، أتصلت بصديقي، الذي احضر لي المجموعة الكاملة، وأنا منهارة: "سيزون عشرة مش شغال! مش شغال!" ولأن صديقي هذا تزوج مرتين وطلق مرتين، فهو متمرس في مهارات النسيان، لذلك في اليوم التالي أعد لي الموسم العاشر على وجه السرعة. أنا لم أكن أبداً الشخصية الـFriends، ولكن تحتم عملية مسح الدماغ بعض الإجراءات الجذرية.

نلح على هبة أن تأتي لترى البروفات، ويحاول طارق إقناعها: "لازم تيجي! هتشوفي عبط الدرفيل". نضحك أنا وهبة، بينما أحاول أن أفكر في البروفات وعلاقتها بالدرفيل، أو أن أتذكر أي شيء عن درفيل عبيط. يشرح طارق: "عارفه الدرفيل لما يكون متقل في الأكل، وماشي في البحر مضيّع؟ آهو هو ده عبط الدرفيل!"

وهكذا...أبدأ عامي التاسع والعشرين وأنا في كامل جنوني. يتصل بي الأصدقاء عبر المحيطات والبحار والأنهار والكباري ليهنئوني، فانفجر في البكاء لامتناني الشديد لمجرد وجودهم في حياتي. أنا محظوظة جداً...جداً جداً جداً، فلقد سقطت من الدور الثلاثين على وسادة حانية كبيرة من الأيادي المتشابكة. ما بين الطبطبة والركلات والأحضان والكلام والكلام والكلام والسكوت، والرسائل والمكالمات، وفوق الكثير من الأكواب والفناجين والكئوس والأطباق وأعقاب السجائر، تدثرت بغطاء سميك قوامه كل هذا الحب، ورحت في نوم عميق.

36 comments:

  1. awlan kol sana wentee tayeba
    w welcome back
    ana wa7shetnee el 7awadeet awe
    w atefe2 ma3akee f enek teetohee bmazagek f west el balad
    momte3a 7'sosan waya nas

    ReplyDelete
  2. هو استفسار متطفل
    هو فيه مشروع كتاب قريب ؟؟

    ReplyDelete
  3. :)

    sweet - a7la 7aga lama tesma3 7adota w tefdal mobtasem men awel kelma l2a7`ier kelma ... a awel mate7`las, tzbot nafsak wenta lesa mobtasem :)

    ra3`m el mood el saye2 ely kolena feeh these days - bas u r really great :)

    ReplyDelete
  4. يعني طب مصعبتش عليكي و انا حطة الديسبلاي مسدج بتاعت الجي تشات اني هموت علي حتة غزل البنات..بلاش كيش..طب فتفوتاية واحدة بث

    ReplyDelete
  5. "سيزون عشرة مش شغال! مش شغال!"

    تضحكت من قلبي!! من وقت لوقت، مظبوط بشيل هالمسلسل الهم عن القلب..

    أعجبني تدوينك لأحداث النهار الذي تمرين به..
    وعلى خط آخر.. كل سنة وأنتي بخير.. وهي جرأة من فتاة أن تعترف بعمره ولو عبر الإنترنت!!

    وشو قصة هالكتاب اللي عم يحكي أحمد عنو؟؟

    ReplyDelete
  6. يا ستى كل سنه و انت طيبه
    و عقبال 60 سنه كمان
    ليا سؤال أزاى و انت من القاهره تتوهى فى وسط البلد مع صحابك
    ليا مش مهم
    المهم المدونه كوكو خالص

    ReplyDelete
  7. kol sana wa enty tayeba.
    I actually knew how it feel when someone regard his birth day as a ( a gone year ) instead of ( got another year to practice, experience, and enjoy).. i don't know how u percieved it but i enjoy my time when reading ur 7awadeet ...
    youssef

    ReplyDelete
  8. كل سنة وانتي طيبة وربنا يفك سجننا كلنا ويكتر من غزل البنات

    ReplyDelete
  9. :) ana ba3asha2 el7awdeet..ur words are very rich we bet7'aly elwa7ed 3ayez ye2ra aktar.. :) so thanks for sharing these words..

    ReplyDelete
  10. الحمد لله !!!
    توجد حدوتة جديدة !!!!

    كل سنة و إنت طيبة, و سيزون عشرة على فكرة تحفة ;)

    ReplyDelete
  11. انا كنت خايف توته توته دى تبقى الاخيره
    مش عارف ليه كنت حاسس انك ناوياها
    انا حتى بعتلك ميل
    وصل؟
    كل سنه وانتى حدوته

    ReplyDelete
  12. welcome back! halla2 sar fina nerteh :)

    ReplyDelete
  13. كل سنة وانتى صافية وحدوته وجميلة دايما ومبسوطه يا رحاب يا بسام :)))

    ReplyDelete
  14. kol sana wenty tayeba (belated), u certainly put a smile on my face :)

    ReplyDelete
  15. Ahhhhhhh ya albi..
    3arfa ya Hadouta.. ana ba7ibik wi nefsy akoon ma3akai everywhere you go.. Thru ur 7awadeet I live the days I missed...

    its us that are lucky for your friendship..:)

    ReplyDelete
  16. بصراحة ......... يا بختك

    وكل سنة وانتي دايما وسط ناس بيحبوكي وحاجات بتحبيها

    ReplyDelete
  17. كل سنة وانت طيبة
    ومرحباً بعودتك

    ما الذي حصل لبقية الحواديت؟

    ReplyDelete
  18. هي صحيح الـ29 بتعمل اكتئاب علشان بعدها على طول، ومن غير أي فرصة للتأجيل أو الاستئناف، فيه الـ30.... المهم يا ستي، سنة تفوت ولا حد يموت. وكل حدوتة وانت بخير.

    ReplyDelete
  19. في كل مرة تختبرين فيها القاع.. تنفضين عنك غبار الهاوية وتعلنين قيامة الروح
    يتماهى معك كثيرون: لعنة التفاصيل.. مغامرات الصبا مع رفيقات العمر.. القرارات "النهائية" التي يمكن الرجوع عنها..بهجة الاكتشاف.. وحكايات القلب التي لم تكتمل
    ربما..حان الوقت كي تقتربي أكثر.. لنراك

    ReplyDelete
  20. أول مرة أعلق في مدونتك بس التحية واجبة يعني

    "كل سنة و أنتي طيبة يا رحاب"

    ReplyDelete
  21. الأصدقاء نعمة.. أدامها الله عليكِ

    ReplyDelete
  22. And I am grateful too that I have you in my life.

    Always come back writing here Rours :) You've been missed my friend.

    ReplyDelete
  23. اول الكلام نصلى ع النبى
    مدونتك جميلة
    كل سنة وانت طيبة
    وعقبال يارب
    ابن الحلال

    ReplyDelete
  24. كل عام وإنت بخير
    وأنا مثلك بحس إنو الاقتراب من الثلاثين صعب
    بس عمر وراح يمر
    مدونة رائعة جدا
    وكتابات مميزة
    تحية لك

    ReplyDelete
  25. متشكرة يا جماعة على الونس الجميل ده :)

    ReplyDelete
  26. كل سنه و انتي فرحانه .. كل سنه و انتي بني ادمه بكل ما تحمله الكلمه من متناقضات ..

    ReplyDelete
  27. كل سنة وانتي طيبه

    ReplyDelete
  28. أحكي لي حدوته
    ‘الله دي ملتوته انت بقكك بينقط عسل
    ممكن أقول انتي بلوجركك بينقط عسل
    وحشني كلامك وتعليقاتك المدهشة
    أحبك في كل الفصول
    حتي لو كنت مش عارف أوصلك مشاعري
    خلاص خديني علي عيبي

    ReplyDelete
  29. kol sana wenti tayeba
    happy birthday
    bonne anniversaire
    cumpleanos feliz. BA3TAZER b sheda 3al ta27'ir bas lesa fet7a el yomen dol kont bamte7en SORRY again

    ReplyDelete
  30. حلوه أوى جملة "قررت أنا و هبة نتوه يوم فى شوارع وسط البلد"أنا قريت الحدوته دى من يومين و الجملة دى عمالة ترن فى ودنى ........ تقريباسعات الواحد بيبقى نفسه يتوه و يغوص جوه حاجة هو بيحبها يمكن تكون بسيطة أو ليها إحساس خاص لينا أنا نفسى جدا" أتوه فى عالم الكارتون
    وفاء

    ReplyDelete
  31. مش عارفة ليه حسيت فيها شبه من أغنية محمد منير "بنات"

    ReplyDelete
  32. وفاء...ساعات بحس إني عايشة في عالم كارتون أصلاً :)

    ReplyDelete
  33. are you a GEMINI babydoll???...welcome to insanity ya rooooby.....ta3aaly ganby....akhbaaar el mohade2aaat wel anti-depressants eeeh?????

    radwa

    ReplyDelete
  34. Rehab ana b7bak awi begad. we r not close i know , bas i really do look at u and know what an amazing person u are:) and u make me laugh frm my heart.. u r so natural and so alive , Keep up :) Love

    ReplyDelete
  35. تصدقي أنا غبي جداً
    أنا مكنتش متخيل أني حمار للدرجة دي
    واضح أني ساعة لما علقت أول مرة كنت محتاج أقول كل سنة و أنت طيب لحد
    انا مش فاهم تعليقي اللي فات

    ReplyDelete
  36. كل سنة و انتي احلي حدوته

    ReplyDelete