Thursday, September 08, 2005

من جوه اللجنة



دي صور أخدتها في اللجنة الانتخابية بنادي السكة الحديد بمدينة نصر



ميكروباص السلاب

ميكروباص ضمن 11 ميكروباص تبع مصطفى السلاب عضو مجلس الشعب عن دائرة في مدينة نصر. الميكروباص ده وأصحابه راح وجه من عزبة العرب تلات مرات وده من الصبح لحد الساعة 3 لما رحت اللجنة



بنحبك

مواد دعائية لحسني على باب اللجنة


هنصوت

اقبال جماهيري فظيع على التصويت (أغلب الناس ما لقيتش أسماءها في اللجنة دي أو لقت رقمها باسم أو اسمين مختلفين وفي الآخر قالوا لهم يروحوا يصوتوا في لحنة في عثمان بن عفان)



أسماء الناخبين

وآدي قائمة بأسماء الناخبين...بعون الله هتلاقي اسمك...هي القائمة مش مترتبة أبجدي...والأرقام غلط...ورقمك غير اسمك واسمك غير رقمك...لكن إن شاء الله خير.



البيه المضيف بتاع الوطني

ولا كأننا في طيارة...شاب شيك ظريف بيشرب مارلبورو لايت وعصير جهينة ولابس قميص مشجر بياخد منك ورقة شبه البوردينج باس اللي بتطلع به الطيارة وتقعد في كرسي جنب الشباك أو على الممر...ده طبعاً لو انت جاي تبع الحزب الوطني ومندوبين الحزب اللي في اللجنة ادولك الورقة دي من غير لا بطاقة بامبي ولا حاجة...الأخضر ثم الأخضر ثم الأخضر



Image hosted by Photobucket.com

ده شكل البوردينج باس (boarding pass) إياه



لجنة من جوه

ده منظر للجنة من جوه...اقبال اقبال يا ربي...بيحوشوا في الناخبين مش قادرين. الصورة باين فيها ورا الولد عسكري قاعد. ده في منه على باب كل لجنة



يا حوستي

محتاس...نفسه ينتخب...غالباً أسهل له إنه يغير اسمه من إنه يلاقي اسمه الحقيقي في القوائم دي



وجبات

طبعاً جه وقت الغدا وكل الناس (إياهم) أكلت...إحنا اشترينا ميه وشربنا الحمد لله

نجحنا

بسم الله الرحمن الرحيم...شادي من مدرسة الوطني يوكل...إجابة السؤال الأول: مصر...والثاني: نعم...والثالث: أيوالله



ملكة جمال

المتسابقة الفائزة



boarding pass people

صورة مهزوزة خالص بس دول مندوبين الحزب الوطني اللي بيطلعوا للناس بتوع الحزب ورقة الحزب علشان ينتخبوا (الحزب برضه)

دعاية جوه

طبعاً مافيش دعاية للريس جوه اللجان...انتوا هتهرجوا!



مها فسفوري

ده صباع مها...متفسفر خالص



Image hosted by Photobucket.com

وده نفس الملصق الدعائي بس الساعة 9 بليل



ثريا لبنه بقى كانت عامله تسهيلات للمواطنين اللي هيموتوا ويصوتوا...بلا بامبي بلا خوتة!

بطاقة بطيخ

بطاقة بطيخ 2

13 comments:

  1. رحاب
    مجهود رائع ومتابعه جيده ولا قناه الجزيرة
    وبعدين ثريا لبنه ماهياش عضو مجلس الشعب
    دى خسرت سنه 2000 امام فوزى السيد على ماأتذكر

    ReplyDelete
  2. مش عارفه مين الحرامي المحلي عندنا في مدينة نصر الأيام دي بصراحة

    يمكن تكون عضو من منازلهم

    ReplyDelete
  3. ماهو فوزي السيد توفى إلى رحمة الله وعملوا انتخابات بعدها كسبت فيها ثريا لبنة.

    ReplyDelete
  4. ممتاز يا حدوتة

    ReplyDelete
  5. الحقيقة .. مجهود رائع الشكر مش كفاية عليه

    تسلم ايدك

    ReplyDelete
  6. أنا أول مرة اعرف إن فوزي السيد مات! حصل امتى ده؟

    متشكرة يا جماعة بس دي مجرد شوية صور ومش صور كويسة أوي يعني :)

    ReplyDelete
  7. مجهود رائع. وإن كانت الحدوتة حزينة إلا أنك حكيتيها بشكل صادق جدًا. شكرًا!
    ـ

    ReplyDelete
  8. thanks for the effort ..Very nice work , Keep it up .

    ReplyDelete
  9. مش فاهم حكاية الست ام "اشارب اخضر" لفته على وسطها. صوتي لمبارك وروحي لبيتكم. ليه المبالغة في النفاق؟

    ReplyDelete
  10. كويس ان انت عرفتى تصورى
    أنا طردونى بره اللجنة لما لاقونى بصور
    رئيس اللجنة خد موبايل ابن عمى اللى كان بيصور بيه .. ومسح منه الصور ..
    مع اننا كنا واخدين بالنا جدا ان مفيش حد ياخد باله
    وكان فيه صور كتير حلوة_ وحشة يعنى _
    يللا خير

    ReplyDelete
  11. لأ هو احنا الحمد لله محدش ضايقنا خالص...ولا حد حتى سألنا انتوا تبع مين...واللي سألونا كانوا الناخبين اللي كنا بنحاول نساعدهم

    أنا لسه بحاول اخلص كتابة اللي حصل في نادي السكة وقسم مدينة نصر...الكتابة صعبة أوي اليومين دول :(

    ReplyDelete
  12. أنا ماعرفش عمرو جاب الأخبار دى منين
    ثريا لبنه الحزب الوطنى مارشحاش فى إنتخابات 2000 ونزل واحد تانى مكانه خسر وكسب فوزى السيد مستقل بدل منه وبما إن الراجل له سوابق بعد سنه أثاروا القضيه القديمه بتاعته وسحبه منه الحصانه وشالوه وعملوا إنتخابات تانيه فى مدينه نصر كسبها السلاب ..دى القصه على حسب ماأتذكر
    الراجل مامتش ولا حاجه
    وسورى يارحاب على المداخله

    ReplyDelete
  13. tu sais ceci et partout dans le monde arabe....que dieu nous aide surtout.!!!!!!!!!!!!!!!!!!!!!!???
    marhaban biki fi modawwanati.

    ReplyDelete