Sunday, November 22, 2015

الحمار المخطط الحائر

كان يا ما كان.. يا سعد يا إكرام.. ولا يحلا الكلام.. إلا بذكر النبي عليه أفضل الصلاة والسلام.
كان فيه حمار مخطط جميل.. جميل، لكن كان نفسه يبقى حصان. كان دايما بيقف بعيد على طرف الساحة اللي فيها السيرك، مستخبي تحت الشجرة الكبيرة وبيتفرج على الحصنة وهي بتدرب جوه. تمر عليه الساعات الطويلة وهو واقف في مكانه مسحور، ومرات يحاول يقلد حركاتهم. بقى عارف أساميهم وفقرة كل حصان منهم.
وفي يوم من الأيام، اتشجع  وقرر ينضم لهم. راح خبط على باب المدرب وقال له إنه عايزه يدربه علشان يقدم فقرة في السيرك. المدرب ضحك وقال: وأقول إيه للناس؛ ده حصان بس بهت في الغسيل؟ ولا لسه الدهان بتاعه مانشفش؟ انت حمار مخطط يا ابني، عيش عيشة أهلك؛ روح اجري في الغابة، اهرب من أسد ولا ارفس غزالة.
الحمار المخطط زعل لكن مايأسش. تاني يوم راح خبط على المدرب برضه. المدرب فتح الباب وجاله ذهول لما شاف قدامه شجرة على شكل حصان. لما اكتشف إن ده الحمار المخطط ضحك، ولما الحمار قال له: أنا هعمل فقرة الشجرة الراقصة، المدرب ضحك أكتر وطرده بالذوق.
الحمار المخطط زعل لكن مايأسش. تاني يوم راح خيط على المدرب، اللي زعق له المرة دي لما لقاه لازق ريش على جسمه كله وبيقول إنه هيعمل فقرة الفرخة الراقصة.
الحمار زعل لكن مايأسش. قعد يتمشى كتير في الغابة ويفكر؛ هل هو فعلا عايز يبقى حصان؟ هل هو عايز يبقى في السيرك؟ طيب هل هو عايز يرقص مع الحصنة؟ مممم.. مش متأكد أوي. هو عارف إنه زهق من حياة الغابة العبثية. هيبقى حمار مخطط، وبعدين؟ في يوم هياكله الأسد وهتخلص الحكاية.
وفي يوم افتتاح السيرك فوجيء الجمهور بالحمار المخطط داخل يجري بسرعة جدا وبيشوط كل حاجة، لحد ما شاط شبكة كلها كور ملونة. قعد يشوط الكور على الجمهور والجمهور يضحك، وعمال السيرك بيجروا في كل مكان بيحاولوا يلموا الكور ويقبضوا على الحمار المخطط.
وتاني يوم، كل جرايد البلد كانت بتتكلم عن مَولِد نجم جديد في السيرك.

8 comments:

  1. انا جبيت الحمار المخطط الجميل ده ، هو الحقيقة يمثلني
    أنا مستنية النسخة بالرسوم المصورة
    :)

    ReplyDelete
  2. الف مليون حمدالله ع سلامتك يا د رخاب
    ماتتصوريش قمة سعادتي بعودتك
    انا من متابعينك من زمان جدا من ايام المدونات2006
    والمطبخ الفرنساوي انت حقيقي استاذتي ف الكتابه وملهمتي
    نفسي اقرا تدوينتك دايما بصوتي وتسمحيلي بده لان عندي هاجس اتكلم عن حاجتك بدون اذنك

    ReplyDelete
  3. هحكيها لأختي الصغيره انهارده 😁😁
    و بجد شكرا علي كتاباتك الحلوه دي و افضلي متواضعه كده علطول 😊😇

    ReplyDelete
  4. هحكيها لأختي الصغيره انهارده 😁😁
    و بجد شكرا علي كتاباتك الحلوه دي و افضلي متواضعه كده علطول 😊😇

    ReplyDelete
  5. اشكرك علي الابداع الذى اشهده منك دائما

    ReplyDelete