Wednesday, July 12, 2006

يوم ما اتاكل التور الأبيض



...كان ياما كان، يا سعد يا إكرام، ولا يحلى الكلام إلا بذكر النبي عليه الصلاة والسلام

كان في تلات تيران عايشين في غابة، واحد أبيض وواحد أحمر وواحد أسود، وكان عايش معاهم في الغابة أسد لكن ماكانش بيقدر عليهم لإنهم كانوا متجمعين مع بعض عليه. الأسد قعد يدحلب ويتسحلب لحد ما بقى صاحبهم ورايحين جايين سوا طول النهار، وسهرات وخروجات وعزومات ياما! وفي يوم من الأيام الأسد اخد التور الأسود والأحمر على جنب وقال لهم: "ماحدش فاضحنا في الغابة دي غير التور الأبيض! لونه أبيض كده وملعلع وحيخلي الصيادين ياخدوا بالهم مننا وباقي حيوانات الغابة يحسدونا! لكن أنا وانتم ألواننا قريبة لبعض، بأقول إيه...سيبوني آكله علشان نقدر نعيش في الغابة مطمنين وكافيين خيرنا شرنا

"!قالوا له: "لأ إذا كان فاضحنا وغرضك أمننا وسلامتنا...يبقى تاكله طبعاً

.وفعلاً الأسد ماكدبش خبر واكل التور الأبيض

عدت الأيام في السهرات والخروجات والعزومات، وفي يوم كده الأسد اخد التور الأحمر على جنب وقال له: "التور الأسود ده صوته عالي أوي وهيلم علينا الصيادين، لكن أنا وأنت صوتنا رقيق! أنا بأقول آكله عشان نقدر نعيش في هدوء والغابة ماتقولش علينا إرهابيين


"!التور الأحمر وافق: "ده كله إلا الإرهاب يا جدع

.والأسد ما كدبش خبر واكل التور الأسود

مافيش كام يوم، والأسد والتور الأحمر قاعدين يشيشوا، الأسد زغر للتور الأحمر وقال له: "بأقولك إيه يا تور أنت...أنا هآكلك! طلبت معايا آكلك!"

".التور الأحمر قال: "طيب خليني أصوت على نفسي تلات مرات...إكمن مافيش تور فاضل يصوت عليا

الأسد قال له يصوت على بال ما يخلص حجر المعسل

"!قام التور الأحمر رقع بالصوت: "يا خيبتك يا أحمر يا خيبتك...يا خيبتك! أنا اتاكلت يوم ما اتاكل التور الأبيض

__________
القصة الأصلية منسوبة إلى أمير المؤمنين علي بن أبي طالب رضي الله عنه، ولكني أعدت صياغتها. وردت القصة في كتاب مجمع الأمثال للميداني والمستقصى في أمثال العرب للزمخشري

28 comments:

  1. Very very nice and smart,
    a7la tashbeeh w it seems that the arabs are like that since the day they were born... the old story is an evidence referring to the treachery since very long time, this if we put the history aside which's full also of disappointments. It's in arabs' blood, even sometimes during their daily life. Why don't we teach this flokloric story to our stupid arab leaders - el teeran?

    ReplyDelete
  2. ياة
    فكرتيني اننا بنتاكل من ايام على ابن ابي طالب وحادثة السيقفة المشهورة

    ReplyDelete
  3. قصصك اجمل بكتير من قصص على بن ابى طالب

    ReplyDelete
  4. infantile & rather boring

    ReplyDelete
  5. ياكل الاحمر ياكل الاسود ماعدتش فارقة

    احنا متاكلين و مهضومين و خرجونا فضلات كمان من زمان ...على رأي مسعود في وجهة نظر...نزيد واحد ...ننقص واحد ...مفيش فايدة

    ReplyDelete
  6. جميل قوى حلوه طبعا و مش ملتوته
    بس الحاجه الوحيده اللى ماعجبتنيش جملة البدايه
    مكرره و كنت أتمنى إنك تكون ليكى جملتك الخاصه
    على فكره أنا بكتب شعر عاميه و حواديت زيك ياريت تشرفى مدونتى
    رأيك يهمنى

    ReplyDelete
  7. Its a good story valid for all times
    but it comes from the famous book of KALILA WA DUMNA by Abdullah Ibn El Muqaffaa

    ReplyDelete
  8. and here is a short story;
    Asking an 11 years old boy in a compound of a school sheltering refugees on what he think about the leaflets dropped by Israeli planes, he said it will be more useful if they make them softer, toilet tissues is hard to get.

    ReplyDelete
  9. الأول عايز أقولك إن مدونتى و موقعى هيكونوا موجودين قريب
    عجبانى قوى الحدوته و عاجبنى أكتر أسلوب الكتابه بجد وانا بقرأها حاسس إن أنا سامعك و انتى بتحكيها
    على فكره أنا زيك مهتم قوى بالحواديت الشعبيه
    أنا كنت عامل فريق و كنا مهتمين بفكرة الحكى الشعبى
    كنا بنجيب حواديت من التراث و بنعملها إعادة إعداد عشان تناسب الظرفيه اللى بنعيشها دلوقتى
    حاولى تتابعى إصدارات المكتبه الشعبيه
    و دى سلسله عن الهيئه العامه لقصور الثقافه
    قبل مانسى الفريق كان إسمه (صبا للغناء و الحكى و الشعر)

    ReplyDelete
  10. السلام عليكم
    شكرا شكرا شكرا بالثلاتة ع انك موجودة لاني فعلا باحس بتفاعلات الحياة في نفسي وباضخك وباحزن وانا في رحاب قصرك
    شكرا وربي يعطيك اللي تنوي في خاطرك
    الى اللقاء

    ReplyDelete
  11. رحاب رائعه وواضح اني هاعسكر عندك هنا انا فتحت اكتر من عشر نوافذ من خلال السايد بار اللي على جنب ده والحياه عندك مليانة تحف وحاجات تاكل اجدعها نافوخ بس انا لي تعليق صغنون جدا وانا كنت عامل القصة دي بوست عندي قبل ما اتدمر والمصدر كان كتاب كليلة ودمنة لبيدباوهو شاعر هندي بس كان لبط بيلبخ في الخلق بس على لسان الحيوانات وارجو الا اكون تطفلت او تجاوزت حدودي لكن للامانة حبيت اقولك وبعدين انا للاسف مش عارف مين اقدم (مجمع الأمثال للميداني والمستقصى في أمثال العرب للزمخشري
    ولا كليلة ودمنة) ولك خالص تحياتي يا نبع العلوم والثقافة

    ReplyDelete
  12. معلش بقى كلمتك عن اصل القصة واتلهيت عن اصل القصة بتاعتي انا اللي داخل علشانها وهي طريقة سردك للحدوتة انت اضفتي لها البهارات والتوابل الحراقة بتاعة اللهجة المصرية العظيمة بجد انت استاذة

    ReplyDelete
  13. نفهم من كده
    ان العرب اتاكلوا يوم ما اتاكل " التور الأبيض "
    كلامك كله حكم وعبر لمن يعتبر
    زركوش

    ReplyDelete
  14. انا بقرا و انا متنحة مش عارفة ازاى ممكن حد يبقى فنان كدة يمكن دى مش احلى واحدة عملتيها بس ما علينا...بتجيبى كل التفاصيل و تقولى كل الكلام بمنتهى السلاسة
    احلى حاجة تعمليها فى حياتك انك تفضلى تقولى حواديت و تشمى ورود
    http://eftekarat.blogspot.com

    ReplyDelete
  15. قصة معبرة
    تحياتى

    ReplyDelete
  16. قصة جميلة
    بس المفروض نصوت احنا كمان
    www.lost-empire.blogspot.com

    ReplyDelete
  17. battalty tekteby leeeh ya rehab???
    el denya dallemet zay ma dallemet 3andy??
    3azraaaky
    radwa atef

    ReplyDelete
  18. ياه .. ياه يا رحاب .. فيه 28 تور في جامعة الدول التورية .. أشكال وألوان .. ولا واحد فيهم خد عبرة من أخوه !!

    ReplyDelete
  19. حدوته
    أحب بس أقلك اني أعجبت جدا بيكي وبشخصيتك الواضحه قوي في كتاباتك الجميله اللي طبعا دمها خفيف جدا بجد عاوزه أقولك اني باحسدك(اوعي تزعلي)بس انا فعلا باحسدك لأني حاسه ان حياتك بجد حياه مليانه حاجات جميله صدقيني انتي بجد ماشاء الله محظوظه جدا ده من وجهة نظري علي الأقل0تعرفي اني دخلت علي السايت ده بالصدفه لما كنت بادور علي أشعار لفؤاد حداد
    بس بجد كانت صدفه جميله لأني عرفتك عن طريقها أو بالأحري عرفتك من خلال كتاباتك
    صدقيني لو قولتلك أنا فعلا حبيتك
    سالي

    ReplyDelete
  20. goooo gooooooooooooo


    mystic_dream

    ReplyDelete
  21. ماشاء الله عليكي بجد
    ربنا يزيدك
    تعبيراتك جميله وطريقتك لزيزه
    اتمني لك التوفيق دائما يارب

    ReplyDelete
  22. في حكايه أظرف منها
    حكاية
    ال 70 مليون اللي مربوطين في ساقية

    حسن أرابيسك ( مدونة فض فض ) قريباً

    ReplyDelete
  23. تصحيح
    في حكاية أظرف منها
    حكاية
    ال 70 مليون تـــور اللير مربوطين في ساقية

    ReplyDelete
  24. سلام الله عليك:جميل ان نستقي العبرة من الماضي والأجمل أن نعيد صياغته ونلبسه من واقعنا ثوبا جديدا يناسب الزمان والمكان وان كان الماضي يظل هو نبع الأصالة.لك كل التهنئة على الكتاب وعلى البراعةوأجمل منهما ابتسامتك
    الى اللقاء

    ReplyDelete
  25. battalty tekteby leeeh ya rehab???
    el denya dallemet zay ma dallemet 3andy??
    3azraaaky

    ReplyDelete
  26. a7la tashbeeh w it seems that the arabs are like that since the day they were born... the old story is an evidence referring to the treachery since very long time, this if we put the history aside which's full also of disappointments. It's in arabs' blood, even sometimes during their daily life. Why don't we teach this flokloric story to our stupid arab leaders - el teeran?

    ReplyDelete
  27. سلام الله عليك:جميل ان نستقي العبرة من الماضي والأجمل أن نعيد صياغته ونلبسه من واقعنا ثوبا جديدا يناسب الزمان والمكان وان كان الماضي يظل هو نبع الأصالة.لك كل التهنئة على الكتاب وعلى البراعةوأجمل منهما ابتسامتك
    الى اللقاء

    ReplyDelete
  28. حدوته
    أحب بس أقلك اني أعجبت جدا بيكي وبشخصيتك الواضحه قوي في كتاباتك الجميله اللي طبعا دمها خفيف جدا بجد عاوزه أقولك اني باحسدك(اوعي تزعلي)بس انا فعلا باحسدك لأني حاسه ان حياتك بجد حياه مليانه حاجات جميله صدقيني انتي بجد ماشاء الله محظوظه جدا ده من وجهة نظري علي الأقل0تعرفي اني دخلت علي السايت ده بالصدفه لما كنت بادور علي أشعار لفؤاد حداد

    ReplyDelete