أرز باللبن لشخصين في معرض الكتاب

كل سنة وإنتوا طيبين.. معرض الكتاب جه من تاني :)

يسعدني أدعوكم لحفل توقيع في المعرض لكتابي
أرز باللبن لشخصين
يوم الأربعاء 3 فبراير الساعة 5 مساءً
بجناح دار الشروق - بوابة ممدوح سالم

هيشاركني التوقيع
غادة عبد العال لكتابها: عايزة أتجوز
أحمد العسيلي لكتابه: كتاب مالوش اسم
هيثم دبور لكتابه: أول مكرر

أصداء الرز بلبن

تحديث

الأحد 15 يونيو

مقالة رقيقة في مِصري

الثلاثاء 10 يونيو

كان في مقال حلو في الأهرام عني وعن عمر مصطفى بصفتنا من نجوم المدونات بس للأسف مش عارفه ألاقي اللينك الصح للمقالة

الخميس 3 ابريل

من المدونين للمدونين :) عمرو عزت كتب عن مدونات الشروق في جريدة البديل

الثلاثاء 4 مارس

النهارده إبراهيم فرغلي كتب في جريدة النهار مقال جميل يكمل الدايرة :) إبراهيم كان من أوائل الناس اللي عملت معايا حوار في 2005 على أساس إني من المدونات الأدبية الواعدة.. والنهارده بيكتب عن الكتاب.. الأدبي الواعد برضه

الاثنين 3 مارس

لسه مخضوضة :) بس سحر الموجي كتبت عني مقال جميل جدًا في المصري اليوم إمبارح.. وقالت إنها لما تشوفني هتقول لي كلام أكتر.. وده شيء يسعدني جدًا طبعًا

ودلوقتي بقى عندي صفحة لكتابي على الفيس بوك علشان آخد وآدي مع الناس كده ويعرفوا أخباري أول بأول

الخميس 14 فبراير

من كتر الفرحة أنا مخضوضة أوي.. ولا عارفه أنام ولا أشتغل.. بس قلت لازم برضه أعمل تغطية إعلامية سيبرية للحدث

حلقة العاشرة مساءً موجودة على يوتيوب: الجزء الأول، الجزء التاني، الجزء الثالث (ولا ليالي الحلمية).. والشكر لمحمد سمير ولستُ أدري

وجريدة الجارديان كتبت عن مدونات الشروق في مقالة عن الكتب في مصر

وياللا بينا عاملين لي إعلان عن مناقشة الكتاب.. والشكر لعمر مصطفى

وإمبارح الأربعاء 13 فبراير شرّفني الأستاذ أحمد بهجت وكتب عن الرز بلبن في عمود "صندوق الدنيا".. وأحب أشكره جدًا على اللفتة الرقيقة دي

الرز بلبن في مساءك سكر زيادة

أينعم.. كالعادة وبكل سعادة أنا وغادة وغادة

هنكون ضيوف في برنامج مساءك سكر زيادة

على أو. تي. في النهارده.. تقريبا 7 مساء

وهنقعد الحلقة كلها نناقش البطيخ والطبيخ والرز بلبن والعرايس والعرسان

:)

اللي سبق أكل النبق

.. وأكل الرز بلبن كمان :)

الطبعة الأولى نَفَدت وجاري طبع التانية!

مزيد من المقالات والتغطيات: في الدايلي نيوز المصرية، وفي مصراوي، وفي بص وطل

الرز بلبن في العاشرة مساءً

جهزوا المعالق بقى :)

يوم الاثنين 11 فبراير

هنكون غادة وغادة وأنا

ضيوف في برنامج العاشرة مساءً على قناة دريم 2

بمناسبة صدور كتابها وكتابها وكتابي

والدعوة عامة.. وشكلها هتبقى لمة! :)

حفل توقيع أرز باللبن لشخصين

سيقام حفل توقيع "أرز باللبن لشخصين"

يوم الجمعة 1 فبراير الساعة 3 عصرا

بجناح دار الشروق بمعرض الكتاب

في اقتراح إن ألبان المالكي يبقى الراعي الرسمي لحفل التوقيع

وفي الحالة دي كل واحد يجيب معاه معلقة :)

وعلى رأي صديقة عزيزة:

ده هيكون أول كتاب يتحط في التلاجة :)

دلوقتي في الأسواق :)

أرز باللبن لشخصين - مجموعة قصصية

الغلاف تصميم الفنان وليد طاهر