Saturday, July 01, 2006

بالأمس حلمت بالبطيخ


أتمدد على سريري في شبه إغماءة رافعة قدمي على وسادة لتكون أعلى من مستوى جسمي. الدنيا حر...حر...حر. يؤلمني الحر جداً لأنه يخفض ضغطي المنخفض بطبيعته، وتتورم يدي وقدمي من الرطوبة. أمارس هوايتي المفضلة في ظل هذه الظروف: الحملقة في السقف. زينت سقف غرفتي بالنجوم والزهور الفسفورية. كيف نسيت الفراشات؟ لماذا لا توجد فراشات فسفورية بجوار الزهور الفسفورية؟ على العموم هذا خطأ يمكن تداركه. يا رب...يا رب بطيخة...وتكون ساقعة يا رب. أركض في دماغي خلف فقاقيع الصابون. فقاقيع...فقاقيع...فقاقيع. إيه الكلمة دي؟ بلالين أحسن. بلالين الصابون. الصابون...الصابون...الصابون. إيه الكلمة دي كمان؟ ماله الكلام عامل كده ليه؟ إني أسبح في المهلبية تماماً. كم سيكون رائعاً لو عملت في مجال بلالين الصابون: أجلس على دكة خشبية تحت شجرة ظليلة وأمامي صندوق خشبي عليه جردل كبير، وأكواب بلاستيكية، وقطع من خرطوم بلاستيكي. يأتي الأطفال ساعة العصاري ليشتروا مني أكواب الصابون، المخلوط بقليل من السبرتو، فهو الذي يجعل البلالين ملونة، هذا هو سر الصنعة، ولذلك يأتي الأطفال ليشتروه مني دوناً عن باقي بائعي البلالين. يغطسون أطراف قطعة الخرطوم في كوب الصابون، وينفخون ملايين البلالين. أحذرهم من شرب الصابون أو السبرتو لأن ذلك سيجعلهم لا يستطيعون أكل الآيس كريم أو الجيلي طوال حياتهم. يسددون ثمن البلالين بشقق من البطيخ. أقضي الصيف كله في بيع البلالين وأكل البطيخ على الدكة.

يدق جرس الباب. اللعنة! ا-ل-ل-ع-ن-ة بجد يعني! من الطارق الداعي الذي جاء ليفرقع مشروعات البلالين؟ أقوم ببطء شديد محاولة ألا يغشى علىّ. أجلس مستقيمة على السرير وأضيق عيني لتذهب النقط السوداء التي ظهرت أمامي فجأة. الضغط الواطي هيفضل طول عمره واطي يا جدع.

أفتح الباب لأجده أمامي بتعبير في منتهى الجدية: "كل الناس بتقول إنها بتحبك، لكن أنا الوحيد اللي جبت لك بطيخة ساقعة".

أشب على رجلي لأطبع قبلة على خده وأسحبه من يده للمطبخ. أقسم البطيخة نصفين وأعطيه نصفها وآخذ الآخر. أفتح باب الثلاجة ونفترش البلاط البارد أمامها ونأكل البطيخ بمغارف الآيس كريم.

"أنا كنت في السرير باحلم بالبطيخ والبلالين".

"ليكي عين بعد كده تقوليلي إني مش فارس أحلامك؟"

"لأ ماليش...من هنا ورايح إنت فارس أحلامي...البطيخية!"

49 comments:

  1. شو مهضومة يا رحاب!

    ReplyDelete
  2. كنا دايماً و انا صغنن نجيب بطيخ و نحطه فى التلاجه و ناكله ساقع و كنت فاكر لحد قريب أن ده سر عائلى و لكن لما كبرت بطلت أكل بطيخ مش علشان أى حاجة غير الكسل و منظرى و انا شاب كده راجع من الشغل شايل بطيخه و ممكن قوى يبقى معايا جرنان بس انا هاعيد التفكير ...أصل حكايه الاكل على بلاط ساقع شكلها جامد ممكن أجربها و زى ما الرز باللبن بقى مقترن عندى بفيروز و المكرونه بالبصل بمحمود عبد العزيز كده البطيخ هيقترن بمنظر فقاقيع (بلالين)الصابون

    انا بتكلم من غير ترتيب ليه ..ما علينا المهم
    شكرا ليكى خليتى لكل حاجه معنى و لون و صوت و ريحه حلوه

    ReplyDelete
  3. انا بكره البطيخ

    بس علشان خاطر الكمتين اللى فوق دول, شكلى كده ممكن مبطاوش أصلاً !!!

    إنبهار أخرق كالعادة :D

    ReplyDelete
  4. جامده جدا
    وخصوصا موضوع اكل نص البطيخ بملاعق الايس كريم
    انا باحب اكل من البطيخه نفسها من غير تقطيع وخصوصا قلب البطيخه اللى ما فيهوش بذر ده
    ههههههه
    اى حد فى بيتنا كان يتهور ويحط نص بطيخه فى التلاجه كان يرجع يلاقيها متقوره وشكلها فظيع

    ReplyDelete
  5. :))))))))
    انا لو حد جابلى بطيخ و شوية عنب ساقعين دلوقنى... ممكن يبقى فارس احلامى انا اساسا :)

    ReplyDelete
  6. كلنا بنشاركك الحلم ده في الحر الفظيع ده ...بس انا باحلم مع البطيخ الساقع وبلالين الصابون يكون فيه حتة جبنة براميلي و رغيف عيش فينو سخن عشان السخن مع الساقع مع البلالين مع الحر هيعملوا كومبينيشن هايل في الدماغ اقوم انسى اني عندي استقبال طوارئ 24 ساعة بكرة

    :)

    ReplyDelete
  7. أيه يا عماد ؟؟؟ أيـــــــــه يا عماد ؟؟ فاضحنا في كل حتة كدا

    ReplyDelete
  8. الضغط الواطي هيفضل طول عمره واطي يا جدع.
    و الله عندك حق
    مافيش حد عبر عن مأساة هؤلاء القوم الذين يعانون من الهبوط الدائم زيك على فكرة
    تدوينة عسسسسسسسسسولة جداااااااااا

    ReplyDelete
  9. فلان...عندي شباك صغير بيطل على شارع أحلامي...سايباه دايماً موارب...يمكن حد يجي ببطيخة...أو بالونة :)

    هو الصراحة يا جماعة أحسن حاجة قسم البطيخة نصين وتقويره ولبسه على الدماغ علشان تبرد كده في الجو ده :)

    يومكم جميل جميعا :)

    ReplyDelete
  10. حدوته جميله زيك يا حدوته
    أنا كمان بجب البطيخ الساقع قوي
    بس يارب ألاقيه بيدق الباب وجايبلي معاه بطيخه

    ReplyDelete
  11. جميلة
    أعشق البطيخ، لكنني أفضله طازجاً
    وهذا أجمل شيء في البطيخ: طالما كانت البطيخة كاملة غير مقطوعة، يظل داخلها بارداً ومنعشاً مهما كانت حرارة الجو

    طعم البطيخ أفضل بكثير قبل أن يدخل الثلاجة
    لكن فتح باب الثلاجة والجلوس أمامها فكرة منعشة
    !

    ReplyDelete
  12. ياسمين...أنا معاكي تماماً...أحلى حاجة فتح البطيخ وأكله فوراً :) على فكرة أنا بدور على الإيمايل بتاعك مش لقياه...ابعتيهولي أرجوكي :)

    غادة...سيبي الباب موارب :)

    ReplyDelete
  13. انا معاكى فى الكلام ده اووى عشان بجد انا عندى نفس الاحساس ( فلان...عندي شباك صغير بيطل على شارع أحلامي...سايباه دايماً موارب...يمكن حد يجي ببطيخة...أو بالونة :)

    هو الصراحة يا جماعة أحسن حاجة قسم البطيخة نصين وتقويره ولبسه على الدماغ علشان تبرد كده في الجو ده :)

    يومكم جميل جميعا )

    ReplyDelete
  14. this is one refreshing piece of writing.. i feel watermelon juice dribbling down my neck as i'm reading...
    مجنون مين ده اللي ما يقعدش معاكي قدام التلاجة ياكل في بطيخ؟

    ReplyDelete
  15. انتي جميله اوي كده علي طول :)
    بجد حلو اوي

    ReplyDelete
  16. مفيش فيدة فينا يا أجمل حدوته! مهما نكبر تفضل جوانا الطفله دي ألي بتحلم بحد يجبلها بطيخ.. أو شوكلاته.. شوكلتايه علي شكل بيت

    ReplyDelete
  17. إني مزبهل منشكح محلق ... ونفسي في بطيخ من اللي في التلاجه!

    ReplyDelete
  18. I love Watermelons

    ReplyDelete
  19. واضح جدا تأثير البطيخ المسرطن عليك,والدليل على الكلام ده البلالين والصابون..........خلوا باليك من تسمم البطيخ .فاكره والا أفكرك

    ReplyDelete
  20. البطيخ ده حبي الأول و الأخير بس عارفة ايه اللي يضحك انك تفضلي تحلمي بفارس أحلامك بيخبت و شايلك البطيخة و لما يجيبهالك و ييجي تضحكي و تقوليلوا زمن البطيخ عدي و فات أحنا في زمن الكريز:)

    حمراء و حلوة يا جميلة:)

    ReplyDelete
  21. لأ لأ...كريز إيه...الكريز مش هينفع يتاكل بمغرفة الآيس كريم :)

    طب تصدقوا بقى إني من يوم البطيخ قدام التلاجة ده وأنا زوري واجعني؟

    مريم...يا هما المجانين...يا احنا اللي عباقرة :))) واحشاني

    مي...المشكلة إني ساعات بابقى مش عاوزه شوكولاته على شكل بيت...بابقى عاوزه بيت من الشوكولاته...أصلاً :))

    ReplyDelete
  22. لأ لأ...كريز إيه...الكريز مش هينفع يتاكل بمغرفة الآيس كريم :)

    طب تصدقوا بقى إني من يوم البطيخ قدام التلاجة ده وأنا زوري واجعني؟

    مريم...يا هما المجانين...يا احنا اللي عباقرة :))) واحشاني

    مي...المشكلة إني ساعات بابقى مش عاوزه شوكولاته على شكل بيت...بابقى عاوزه بيت من الشوكولاته...أصلاً :))

    ReplyDelete
  23. ههههههه.. يا خراااابي
    عسل والله
    طيب تصدقي يا رحاب، أنا ليّ مرتين ييجي البطيخ بإلحاح على بالي ويبقى في نفسي بطريقة مزعجة... وللأسف ساعتها بتكون الحالة المعوية مش مظبوطة
    نفسي ف بطيخ ساقع ومسكر ومرمل
    يا سلااااااااااااااام

    *:

    ReplyDelete
  24. يعنى تتخلى عن حلم مستقبلك فى بلالين الصابون .. و تحددى فارس أحلامك ببطيخه ؟أمال لو كان سقعلك مانجه كنتى عملتى أيه ؟ .. لا حول الله ..
    عموما أنا باكتب لأن بنتى قرت موضوع البطيخه و عجبها جدا و ماكانش عندها وقت تكتبلك تعليق ..
    أنا كمان عجبنى الموضوع .. حساس و رائع و عميق .. و كمان طراوه .. ينفع فى الحر ده ..

    ReplyDelete
  25. خطوة عزيزة يا وفاء :) إيمايلي أهوه

    hadouta@gmail.com

    لاست نايت: لأ لأ...المانجه ليها مكانة خاصة جدا في قلبي...مش عارفه لو حد جابلي شوب مانجه ساقع على غفلة كده ممكن اعمل إيه :)

    دعاء...ممكن تخليكي في البلالين لحد ما يجي أوان البطيخ :)

    ReplyDelete
  26. وهكذا تلتقي المنانجاة والبطيخ
    ومغرفة الأيش كريم في أقوى درامة بطيخية في الموسم

    مش عارف ليه افتكرت إبراهيم سعفان في تجيبها كده تجيلها كده هي كده
    يا تويل يا تويل يا تويل
    انتم بيأكلوكم ايه ؟

    انتو بيتجبوا الكلام ده منين ؟!!
    :)

    ReplyDelete
  27. miss you so much rahouba
    and miss the days of bateekh

    love you all

    ReplyDelete
  28. واحشني جداً يا أُس :) ومبسوطة إنك لسه بتعدي من هنا :)

    فاكر لما أنا وإخواتك قعدنا على سور الشاليه عند ألفونس...ناكل شقق بطيخ ونمسح وشنا بالقشر علشان في حد من الكبار اشتغلنا وقال إن قشر البطيخ وميته حلو للبشرة؟ :)

    سلامي لمنال :)

    ReplyDelete
  29. هون الابطيخ بينباع بالحز.. مش بطيخة كاملة.. إلك حق تحلمي فيه..
    :P

    ReplyDelete
  30. لا يا هلال...هنا البطيخة بطيخة عن جد...نيالنا! :)

    ReplyDelete
  31. النهاردة لقيت صديق بيقولي
    إني اسبح في المهلابية تماما
    عجبتني
    موووووووووووووتتتتتتتتت
    ساعتها قال لي ادخل على البلوج حدوتة
    بجد جامد
    هو انا مش بعرف اكتب بلوجز بس ادينى بحاول
    و رغم اني بكره البطيخ
    لكن ممكن اكله و انا بفرقع في البلاليين وانا سابحة في الملابية تماما

    ReplyDelete
  32. wait for elgarida

    ReplyDelete
  33. كنت صغير قاعد جمبها .. قطعتلى حته وادتهانى وقالتلى انت بتحبها ... من ساعتها مش عارف هو انا بحب البطيخ فعلا ولا دا كان بس رأيها ... الله يرحمها

    مدونتك واسلوبك رائعين جدا ويكون ليا الشرف لو نورتى مدونتى المتواضعه

    ReplyDelete
  34. اسلوب قصصي راشع الا أنك لو كتبت بالفصحي لكنت قي مصاف كتاب القصة القصيرة
    فعلا القصة رائعة

    ReplyDelete
  35. هناك مواضيع تا اخذ الانسان الا عالم الخيال وهناك الا عالم الواقع او العلم
    بس بصراحه
    موضوعك بيفوت بالحيط
    كوني بخير

    ReplyDelete
  36. شوفي
    أناأتابع مدونتك من زمااااان
    فقط أحب أن أحييك

    ReplyDelete
  37. يا حدوتة الحواديت ... :):):)
    أنا جربت موضوع البطيخ بمغارف الأيس كريم ده .. طلع اختراع رائع
    البطيخ المسكر على شكل كور طفولية غير منتظمة ... في أحلى من كده !!!؟؟؟

    ReplyDelete
  38. أتمني ان نتبنى جميعا كمدونين كلمه واحده بتاريخ واحد نحدد فيه رأينا للعالم اجمع
    اتمني ان ندون مدونه واحد بتاريخ 27/07/2006
    كلنا كمدونين نكرر عباره واحده
    كلنا مع لبنان وفلسطين ضد اسرائيل والمحتلين
    بالعربي بالانجليزي المهم نسمع صوتنا للعالم
    وان لم نستطيع حمل السلاح فالنحمل الكلمه
    وبأي لغة نستطيع نشرها
    بالإنجليزية
    We are with Lebanon and Palestine against Israel and occupiers
    والفرنسية
    Nous sommes avec tous le Liban et la Palestine contre l’Israel et les occupants
    والألمانية
    Wir sind zusammen mit dem Libanon und Palästina gegen Israel und Besatzer
    والإسبانية
    Somos todos con Líbano y Palestina contra Israel e inquilinos
    والصينية
    我们都是同黎巴嫩和巴勒斯坦对以色列占领者
    واليابانية
    私達はイスラエル共和国および占有者に対してレバノンおよ
    びパレスチナとのすべてである
    تحياتي للجميع

    ReplyDelete
  39. الصدفة الحلوة بقة انى بأكل بطيخ دلوقتى بالصدفة و انا بقرأ كلامك الجميل دة
    و ساقع كمان :)
    يومك ساقع و جميل :)

    ReplyDelete
  40. الله عليك
    تدوينة حلوة
    حمرة وساقعة
    شفتك فى الدستور
    تحياتى
    زورينى

    ReplyDelete
  41. rehab ...meen elly baaasek da ya otta....nice blog sweety...its amazing meeting u here hunni...im radwa ...remember...tant 3aziza??

    visit me sweety radwaatefa@yahoo.com

    ReplyDelete
  42. Besara7a ana awel mara ashof 7ad bykteb bel oslob da!! Ana 7ases enny ba2aly keteer be3eed 3an el 3araby wel 7ekayat. Begad to7fa ana 7a2e2y mesh 3aref a2olek eh! Hayla Hayla ... Mesh el hadota ;)

    ReplyDelete
  43. الله يا رحاب تدوينة جميلة في الحر دا،أول مرة أعدي علي مدونتك . .تصدقي ان أنا كمان بدأت أعيد نظر في فارس أحلامي ،مهم فعلا المدخل البطيخي دا. .

    ReplyDelete
  44. الله يا رحاب تدوينة جميلة في الحر دا،أول مرة أعدي علي مدونتك . .تصدقي ان أنا كمان بدأت أعيد نظر في فارس أحلامي ،مهم فعلا المدخل البطيخي دا. .

    ReplyDelete
  45. f'doأتمدد على سريري في شبه إغماءة رافعة قدمي على وسادة لتكون أعلى من مستوى جسمي. الدنيا حر...حر...حر. يؤلمني الحر جداً لأنه يخفض ضغطي المنخفض بطبيعته، وتتورم يدي وقدمي من الرطوبة. أمارس هوايتي المفضلة في ظل هذه الظروف: الحملقة في السقف. زينت سقف غرفتي بالنجوم والزهور الفسفورية. كيف نسيت الفراشات؟ لماذا لا توجد فراشات فسفورية بجوار الزهور الفسفورية؟ على العموم هذا خطأ يمكن تداركه. يا رب...يا رب بطيخة...وتكون ساقعة يا رب. أركض في دماغي خلف فقاقيع الصابون. فقاقيع...فقاقيع...فقاقيع. إيه الكلمة دي؟ بلالين أحسن. بلالين الصابون. الصابون...الصابون...الصابون. إيه الكلمة دي كمان؟ ماله الكلام عامل كده ليه؟ إني أسبح في المهلبية تماماً. كم سيكون رائعاً لو عملت في مجال بلالين الصابون: أجلس على دكة خشبية تحت شجرة ظليلة وأمامي صندوق خشبي عليه جردل كبير، وأكواب بلاستيكية، وقطع من خرطوم بلاستيكي. يأتي الأطفال ساعة العصاري ليشتروا مني أكواب الصابون، المخلوط بقليل من السبرتو، فهو الذي يجعل البلالين ملونة، هذا هو سر الصنعة، ولذلك يأتي الأطفال ليشتروه مني دوناً عن باقي بائعي البلالين. يغطسون أطراف قطعة الخرطوم في كوب الصابون، وينفخون ملايين البلالين. أحذرهم من شرب الصابون أو السبرتو لأن ذلك سيجعلهم لا يستطيعون أكل الآيس كريم أو الجيلي طوال حياتهم. يسددون ثمن البلالين بشقق من البطيخ. أقضي الصيف كله في بيع البلالين وأكل البطيخ على الدكة.

    يدق جرس الباب. اللعنة! ا-ل-ل-ع-ن-ة بجد يعني! من الطارق الداعي الذي جاء ليفرقع مشروعات البلالين؟ أقوم ببطء شديد محاولة ألا يغشى علىّ. أجلس مستقيمة على السرير وأضيق عيني لتذهب النقط السوداء التي ظهرت أمامي فجأة. الضغط الواطي هيفضل طول عمره واطي يا جدع.

    أفتح الباب لأجده أمامي بتعبير في منتهى الجدية: "كل الناس بتقول إنها بتحبك، لكن أنا الوحيد اللي جبت لك بطيخة ساقعة".

    أشب على رجلي لأطبع قبلة على خده وأسحبه من يده للمطبخ. أقسم البطيخة نصفين وأعطيه نصفها وآخذ الآخر. أفتح باب الثلاجة ونفترش البلاط البارد أمامها ونأكل البطيخ بمغارف الآيس كريم.

    "أنا كنت في السرير باحلم بالبطيخ والبلالين".

    "ليكي عين بعد كده تقوليلي إني مش فارس أحلامك؟"

    "لأ ماليش...من هنا ورايح إنت فارس أحلامي...البطيخية!"

    ReplyDelete
  46. حدوتة جميلة و احلي ما فيها احلم الي ممكن يكون بسيط بس في ظروف معينة زي الحر الفظيع بيتحول الي حلم كبير
    و بيوضح قد اية الاحلام بتختلف من حد للتاني يعني انا لو فالحر دة مش هحلم ببطيخ لا ابدا انا عيني علي الايس كريم
    انا بحلم بالتقيل
    هههههههههه
    ربنا يوفقك

    ReplyDelete
  47. من أجمل ما قرأتُ لكِ يا ( رَحوبه ) وسلميلي على الفارس البطيخي

    ReplyDelete
  48. i adoreeeeeeeeeeeeeeeeee this storyyy bgdddd:)u're awesome rehab

    ReplyDelete
  49. حلوة اوي و كمان احنا طلبة الألسن واخدينها موضوع دراسي مثال على تقدم الأدب النسائي و المدونات النسائية

    ReplyDelete